АНТИБИОТИЦИ – Аптеки PlusPharma

АКУТНА ДИЈАРЕА – непријател во летните патувања

admin — Thu, 05 Jul 2018 06:00:30 +0000

Летото вообичаено е период на почести стомачни проблеми, проблеми со варењето на храната , појава на зачестена и рертка столица и дијареа. Неретко уживањето во одбраните дестинации може да биде непријатно нарушено токму заради појава на дијареа и проблеми со стомакот.

Што е дијареа?
Дијареата обично се смета за состојба која се карактеризира со честа дефекација и со промени на структурата и конзистенцијата на столицата. Дијареата е предизвикана од зголемена секреција на течност во цревата, намалена апсорпција на течност од цревата или брз премин на столицата низ цревата. Генерално при дијареа, столицата е потечна, без разлика дали фреквенцијата на движењата на дебелото црево се зголемени или не. Може да варира од мека до водена. Во основа дијареата е поделена на два вида, акутна и хронична.

Акутната дијареа трае од неколку дена до една недела.
Хроничната дијареа може да се дефинира на неколку начини, но обично трае повеќе од три недели.

Важно е да се направи разлика помеѓу акутна и хронична дијареа, бидејќи тие обично имаат различни причини, бараат различни дијагностички тестови и различен третман.

Симптомите кои се поврзани со дијареа зависат од причината и видот на дијареата.

Акутна дијареа
Најчесто дијареата е предизвикана од инфекции на гастроинтестиналиот тракт. Микробите кои се одговорни за овие инфекции вклучуваат:

бактерии (Салмонела, Кампилобактер, Ешерихија коли)
вируси (Цитомегаловирус, вирусен хепатитис, ротавирус).
Паразити како Giardia lamblia и cryptosporidium може да предизвикаат дијареа.

Покрај ова постојат и други причини за појава на акутна дијареа:

Интолеранција на некој вид храна
Труење со храња
Интолеранција на лактоза
Некоја хируршка интервенција
Дијареа при патување
Лекови – многу лекови како антибиотиците, можат да предизвикаат дијареа. Антибиотиците ги уништуваат и добрите и лошите бактерии што може да го уништи природниот баланс на бактерии во вашите црева. Други лекови кои најчесто можат да доведат до појава на дијареа се антациди и магнезуим, диуретици, лекови за намалување на нивото на холестерол во крвта, хемотерапевтици, тироидни хормони, антиаритмици, нестероидни антиинфламаторни лекови.
Алкохол
Секојдневен стрес и нервоза

Најчести причини за акутната дијареа (околу 90%) се вирусни и батериски инфекции и паразити.

Симптоми на дијареа
Дијареата може да варира од блага до многу тешка. Благи симптоми се грчеви и надуеност, придружени со многу мека до течна столица, неколку празнења на цревата во текот на денот.
Потешки симптоми претставуваат мачнина и повраќање кои се појавуваат покрај дијареата, а самата дијареа е изразито течна и трае неколку дена.
Кај тешките и опасни дијареи, покрај останатите симптоми, се појавува и грозница,покачена телесна температура и во самата столица може да се најде слуз, крв и необработена храна.

Кога треба да му се обратите на вашиот лекар:
Иако вообичаено не е сериозен здравствен проблем, дијареата може да стане опасна или да сигнализира кон нешто посериозно. Лекарска помош е неопходна доколку го имате:

Знаци на дехидратација
Дијареа повеќе од 2 дена, ако сте возрасен
За деца, ако трае повеќе од 24 часа
Тешка болка во стомакот или ректумот (за возрасни)
Треска од 38⁰ или повисока
Столица која содржи крв или гној
Столици кои се црни.

Дали може да се превенира дијареата?
Неколку основни работи можат да бидат корисни во насока да се превенира појава на дијареа. Ова вклучува прттпазливост кон внесување на храна ( особено при високи летни температури) и хигиена. Во таа насока при патувања и посети на други земји:

Користете само флаширана или прочистена вода за пиење.
Ако користите вода од чешма, превријте ја.
Бидете сигурни дека варената храна што ја јадете е целосно подготвена и се сервира топла.
Избегнувајте масна храна, сосови (особено мајонез), сладоледи и сл
Избегнувајте да конзумирате немиено овошје и зеленчук.

Исхрана при дијареа:
За време на дијареа многу е важно што јадете и пиете. Дехидратацијата од дијареа може да биде дури и фатална. Затоа многу е битно да останете хидрирани и да пиете и да консумирате храна кoja содржи многу течности, а во исто време нема да ги зголеми симптомите на дијареата туку напротив да ги редуцира.

Каква храна и пијалоци не се препорачани за консумирање за време на дијареа?

алкохол
млеко
кафе
сокови и газирани сокови
пржена и мaсна храна
зелка
брокули
грав
грашок
пченка
пиперки
некои млечни производи

Што треба да се консумира додека имате дијареа:

Додека се опоравувате од дијареа, треба да се јаде едноставна храна што лесно може да се обработи, и ќе помогне да се апсорбира малку вода од столицата:⎫ житарици, како што се овес,
пченица или каша од ориз
банани
јаболка
леб или тост
варен компир
незачинети крекери
боровинки

Оваа храна може да биде особено корисна на првиот ден од справувањето со дијареата. Јадењето многу мали оброци во текот на денот може да помогне во зачувувањето на нормалната функција на дигестивниот систем.

Пробиотици
Храната богата со пробиотици, како јогурт и кефир, може да помогне во некои случаи, но во други, пробиотиците може уште повеќе да го иритираат дигестивниот систем. Пробиотиците помагаат во варењето преку подобрување на балансот на добри и лоши бактерии во цревата.

The post АКУТНА ДИЈАРЕА – непријател во летните патувања appeared first on Аптеки PlusPharma.

ЗЛОУПОТРЕБА НА АНТИБИОТИЦИ

admin — Thu, 25 Jan 2018 13:16:43 +0000

Што се антибиотици?

Антибиотиците се супстанции кои можат да ги убијат бактериите (бактерицидно дејство) или да го спречат нивниот раст (бактериостатско дејство). Може да бидат од природно потекло, синтетички или полусинтетички добиени. Тие се добар избор за лекување на бактериски инфекции, но не делуваат на вируси и на габички. Антибиотиците се пуштени во употреба во раните 40-ти години од минатиот век. Во почетокот се користени само во болниците за лекување на силни и животозагрозувачки болести, како што се туберкулозата, воспаление на белите дробови и менингитис. Денес најмногу се употребуваат во примарната здравствена заштита, и тоа, во најголем дел кога не се потребни или неопходни: за благи инфекции, вирусни инфекции и превентивно. Тоа се состојби при кои воопшто не делуваат, а може да нанесат сериозни штети на организмот. Денес е скоро неможно да се најде човек кој никогаш не користел антибиотик. Нивната пречеста и прераширена употреба доведува до негативни последици за луѓето и целото општество, бидејќи доведува до слабеење на имунитетот и развој на отпорни видови на бактерии. Во овој момент, тоа е проблем од глобални (светски) размери во јавното здравство.

Како да се користат антибиотиците
Антибиотиците се добиваат во аптека САМО врз основа на рецепт препишан од лекар, што значи треба да се земаат само по препорака на лекар. Пропишаниот антибиотик не смеете да го делите со друг. Важно е антибиотикот да се зема доволно долго, а не да се прекине со негово земање во моментот кога ќе се почувствуваме подобро. Ако прерано го прекинеме антибиотикот, преостанатите бактерии продолжуваат да се размножуваат и можат да развијат отпорност на антибиотикот.

Антибиотиците се ефикасни во лекувањето на бактериските инфекции ако се земаат:

во препорачана доза
во еднакви временски интервали
доволно долго

Отпорност на бактериите кон антибиотици
Антибиотиците ги убиваат повеќето бактерии, но сепак некои бактерии успеваат да развијат заштита и во тој случај антибиотиците престануваат да делуваат на нив. Колку почесто се земаат антибиотиците толку е поголема опасноста од развој на отпорност. Денес постојат бактерии кои се отпорни на повеќето познати антибиотици и инфекциите со такви бактерии го загрозуваат здравјето и животот. Главната причина за појавата на отпорност на бактериите е прекумерната и несовесна употреба на антибиотиците, нивното земање кога не се потребни, прекин на терапијата со антибиотици пред да биде завршено лекувањето, земање на несоодветни (помали) дози од потребните и непочитување на правилните временски интервали при земањето на терапијата.

Злоупотреба на антибиотици
Антибиотици најчесто се пропишуваат за инфекции на горните дишни патишта (како што се акутна кашлица, настинка, зеленикав секрет од носот, болки во грлото, бронхитис) и средното уво, наспроти доказите дека антибиотиците не делуваат во најголемиот број од овие случаи. Многу луѓе чуваат неискористени лекови за лекување на следната настинка или болки во грлото. Чување на неискористени антибиотици за лекување на следната болест може да изгледа како добра идеја, но само лекарот може да каже кога навистина има потреба од употреба на антибиотици, и ако има, кои се најдобри за болеста.

НЕСАКАНИ ПОЈАВИ ПРИ ЗЕМАЊЕТО НА АНТИБИОТИЦИ
Антибиотиците можат да предизвикаат алергиски реакции кај некои луѓе. Многу често несакано дејство на антибиотиците може да биде и појава на пролив или запек, мачнина и габични инфекции. Антибиотиците, особено оние со широк спектар на делување, ги уништуваат и добрите и лошите бактерии и на тој начин посредно го намалуваат имунитетот. Само цревата содржат околу 1,5 милиони добри бактерии без кои не би можеле да живееме. Кога ќе уништиме голем дел од нив со земањето на антибиотик, се отвора патот за размножување на патогените бактерии, што доведува до нарушувања во системот за варење на храната, главоболка, замор, несоница, болки во стомакот и слично. Земањето на поголем број антибиотици без контрола на здравствен работник нанесува големи штети на здравјето во целост.

Како можеме да го спречиме развојот на отпорни бактерии
Развојот на отпорни бактерии не можеме да го спречиме во потполност, но можеме да го забавиме со правилна употреба на антибиотици, што би значело само по препорака на лекар.

Антибиотиците не се лекови за лекување на грип и настинка
Антибиотикот не е лек за секоја болка во грлото
Со антибиотик се лекуваат бактериски, а не вирусни инфекции
Антибиотикот не е лек за намалување на телесната температура
Нерационалната примена на антибиотиците ја намалува нивната делотворност
Антибиотикот треба да се зема само по препорака на лекар и тоа во точно определено време и дозата треба да се испие цела
Со неправилна употреба на антибиотикот создаваме отпорни бактерии
Тоа се единствените лекови чија неразумна употреба влијае негативно не само на здравјето на лекуваниот пациент, туку делува на здравјето во глобална смисла

Што може секој од нас да направи
Пред да се решите да земате антибиотик, обидете се да се лекувате со некои природни методи на лекување што го зајакнуваат имунитетот и целото тело. Можете да се обидете со употреба на некои природни антиинфективни материи: прополис, ехинацеа, лук, ѓумбир, рен, мајчина душица и други. Силниот имунитет е важен за да се одбрани организмот од инфекции, а тој се зајакнува и одржува со здрава храна, физичка активност и здрав начин на живеење. Здравиот организам е способен да се избори против голем број на инфекции и без антибиотици, и со тоа да стане уште појак. Доколку е неопходно да земате антибиотик, тогаш:

Земајте го само по препорака на лекар
Не барајте од лекарот да ви пропише антибиотик „за секој случај“, и не ги купувајте на своја рака
Терапијата со антибиотици секогаш спроведете ја до крај
Не земајте туѓи антибиотици и не употребувајте ги антибиотиците што ви останале од некоја претходна терапија
За време на антибиотската терапија и две недели по завршувањето може да биде корисно земањето на пробиотик (консултирајте го фармацевтот)

проф. д-р Бистра Ангеловска

The post ЗЛОУПОТРЕБА НА АНТИБИОТИЦИ appeared first on Аптеки PlusPharma.