Комбинирањето на одредени намирници подразбира далеку поголеми нутритивни вредности за организмот, отколку кога би ги консумирале одделно.

Спанаќ + пиперки

Пиперките содржат витамин Ц кој е неопходен за да се апсорбира железото од спанаќот. Комбинацијата на овој витамин и минтерал забрзано делува на анемијата. Спанаќот е познат и по високиот процент на лутеин и витамин А во составот, кои се клучни заштитници на видот.

Овесни снегулки + бадеми

Овесните снегулки го намалуваат холестеролот во крвта. Протеините во бадемите го намалуваат ослободувањето на јаглехидратите од овесот, со што во крвта стасува далеку помал процент на холестерол.

Домати + маслиново масло

Доматите содржат моќен антиоксидант наречен ликопен. Ликопенот има својство да ги врзува мастите, па затоа дозволете му да врзе здрави масти како оние присутни во маслиновото масло. Ваквата комбинација се покажала како успешна при забавување на стареењето и сончевото оштетување на кожата.

Зелен чај + лимонов сок

Со додавање лимонов сок во зелениот чај, спречувате 80 % од антиоксидантите да се скршат при варењето. Што значи, чајот ги задржува главните активни состојки со кои им се спротивставува на слободните радикали чија цел е да поттикнат некакво воспаление.

Црвено месо + рузмарин

Научно е докажано дека рузмаринот го редуцира создавањето на штетните канцерогени материи кои настануваат при готвењето на месото за неверојатни 92 %.

Броколи + јајца

Жените кои секој месец страдаат од менструални непријатности, треба редовно да внесуваат витамин Д и калциум. Ваквите нутритиенти ги намалуваат ПМС симптомите од 30 до 40 %. Од друга страна, со помош на броколите, организмот полесно го апсорбира калциумот присутен во храната. Додека пак јајцата се најдобриот природен извор на витамин Д.

Пилешко + компири

Речиси и да не постои зеленчук што содржи толку висок процент на витамин А од компирот. Но, внесувањето на витамин А без цинк (го има во пилешкото месо, говедското и свинското) е исто како да се обидувате да запалите оган без кибрит. Цинкот е неопходен за да го врзе и да го носи витаминот А во крвта.

Тестенини + оцет балсамико

Дали после јадење тестенини, за помалку од еден час, повторно сте гладни? Ако сте, обидете се да ги јадете со малку оцет. Оцетот содржи киселина која ги забавува варењето и апсорпцијата на глукозата присутна во пастата. На тој начин ќе го контролирате гладот и нема да се прејадувате. Плус, со додавање две супени лажици оцет во тестените ќе го намалите шеќерот во крвта за 20 %.

Јогурт + ленено семе

Јогуртот е дом на повеќе од 400 бактерии, некои добри, некои лоши за организмот. Кога бројката на лошите ќе ја надмине бројката на добрите бактерии, најчесто се јавува проблем со варењето на храната. За да ги поттикнете пробиотските компоненти на јогуртот, неопходно е да внесувате растителни влакна, како оние во лененото семе, за да постигнете баланс во стомакот.

Не толку добри двојки!

Овошје + што било
Нутриционистите препорачуваат свежото овошје да се јаде на празен стомак и со ништо да не се комбинира, бидејќи така побрзо се вари и се апсорбираат витамините.
Кафе + јајца
Полифенолите присутни во кафето му пречат на организмот да го апсорбира железото од јајцата.
Млеко + што било
Со текот на годините, на организмот му станува сѐ потешко да го свари млекото, а кога истото е комбинирано со други намирници како житарки или леб, дигестијата дополнително се отежнува.

The post Хранливи комбинации appeared first on Аптеки PlusPharma.

Секогаш кога го празните фрижидерот од еден куп заборавени остатоци, сетете се дека гладот убива повеќе луѓе на годишно ниво отколку маларијата, туберколозата и сидата заедно.

Гладувањето е секојдневие за 155 милиони деца на возраст под 5 години!

Мотиви за фрлање храна има многу, но посуштински е да се дискутира како да престанеме со оваа лоша навика?

Македонија е рангирана на 8. место во светот по количина фрлена храна според бројот на жители. Околу 30% од храната во Македонија никогаш не се консумира. Анализите покажуваат дека постарите генерации се посвесни за ова прашање, за разлика од младите кои имаат тотално расипнички однос кон храната. Возрасните кај нас се штедливи, се додека не дојдат празници, а заедно со нив и богатите трпези кои служат за покажување моќ и луксуз. Ова не е случај во високоразвиените земји од причина што храната е достапна за сите.

Воведете оброк од остатоци

Неделниот оброк од остатоци се подготвува со намирниците кои мора што поскоро да се изедат. Најмалку еднаш неделно проверете ги намирниците кои се пред истек на рокот и испланирајте ги за некој оброк. Можеби за ручек ќе треба да јадете три сосема различни јадења, но подобро тоа отколку да фрлате храна.

Планирајте ги оброците

Смислете што ќе јадете во текот на неделата и направете список со намирниците што ви се потребни, можеби дел од нив веќе ги имате в кујна. Држете до списокот, бидејќи во големите маркети се делува примамливо. За да не бидете вие тие што ќе ја фрлат таа храна, размислете дали навистина можете да изедете 6 кеси житарки за еден месец?!

Почесто користете го замрзнувачот

Не постои храна што не може да се замрзне, без разлика дали е тоа овошје, зеленчук, подготвен оброк, па дури и леб. Недојадената храна или свежата храна што се натрупала и нема да се изеде, едноставно замрзнете ја.

одржувајте го редот во фрижидерот

Честопати се случува поради хаосот во фрижидерот по вторпат да се купи истиот производ или некој да се расипе. Редот на полиците ќе ви го олесни пазарувањето, но и планирањето на оброците со постарите залихи на кои треба да им дадете приоритет.

Паметно искористете ги остатоците

Донирајте храна секогаш кога можете за да им помогнете на гладните сограѓани или уличните животни. Плодовите што се пред расипување, искористите ги за некој џем или компот, супа или кашички. Дури и лушпите може да ви послужат за подготовка на бујон или ѓубриво за бавча.

Чувајте ја храната соодветно

На суво и ладно место, во фрижидер, убаво запечатена… почитувајте ги правилата и храната секогаш ќе биде свежа. Истечениот рок не секогаш значи дека храната не е за јадење. Ако сте ја чувале соодветно, најверојатно е безбедна за стомакот. Промената на вкусот и бојата кажуваат многу повеќе од назначениот датум.

Контролирајте ги порциите

Гответе онолку колку што можете да изедете. Обрнете внимание кој оброк најдобро и најслабо поминува во домот за да ги адаптирате порциите и да не ви остане храна за фрлање. Оброкот може да стои и до 3 дена во фрижидер, па ако не следниот ден, задутредента повторете го.

The post Фрлањето храна е грев! Сопрете уште денес! appeared first on Аптеки PlusPharma.

Правилната исхрана – половина лек!
Не постои кујна за дијабетичари. Потребна е само правилна прераспределба и комбинација на состојки по количина и вид.
Начинот на исхрана кај болните од шеќерна болест не бара спартански откажувања, гладување и строги диети. Организмот треба да биде снабден со оптимален внес на хранливи материи, јаглехидрати, протеини, масти, витамини, минерали и вода. Препорачливо е дневно да се земаат 5 до 6 оброци во одредени временски интервали со задолжително водење сметка за правилен распоред на скробната храна. Особено е важен последниот дневен оброк, кој се зема непосредно пред спиење за да се оневозможи пад на нивото на шеќерот во текот на ноќта. Генерално, исхраната кај лицата заболени од шеќерна болест мора да биде разновидна и да ги содржи сите видови намирници. Исклучок се, секако, шеќерот и слатките, а се ограничува и употребата на лебот и тестенините.

Често се заборава дека една лажичка брашно е еднаква на една лажица шеќер!

Леб и тестенини
Лебот, печивата и тестенините се богат извор на јаглехидрати, што е причина тие да бидат ограничени во менито на дијабетичарите.
Се препорачува на менито да се застапени леб и печива од интегрално брашно, а да се избегнува белиот леб и печива од бело брашно.
Се препорачува  и црн, ’ржан леб, бидејќи содржи диететски влакна кои спречуваат нагло паѓање на шеќерот по оброкот, што може да се случи ако се консумира бел леб. Доколку оброкот содржи компир, ориз, грав или млад грашок, не се препорачува леб.

Зеленчук
Исхраната на дијабетичарот по правило треба да содржи најмногу зеленчук.
Покрај богатиот состав од белковини, масти, минерали и витамини, зеленчукот содржи и јаглехидрати  особено присутни во гравот, грашокот, компирот, цвеклото, па поради ова нивниот внес треба да е контролиран.
Зеленчукот кој има помалку јаглехидрати може да се јаде во неограничени количини: зелје, спанаќ, блитва, лист од лоза, боранија, тиквици, пиперка, домати, краставици, разни видови зелена салата, модар патлиџан, целер, магдонос, ротквица, зелка, кељ, келераба, прокељ, печурки, праз, лук, брокула и карфиол.
Смрзнатиот зеленчук да се консумира во двојно помала количина од свежиот. Разни гурмански салати кои содржат додатоци како мајонез и павлака, по правило, треба да се избегнуваат или да се земаат во ограничени количини.

Овошје и преработки од овошје
Идеален природен десерт е најдобра алтернатива за слатки. Содржи богат состав на витамини, минерали, диететски влакна, белковини, масти и секако јаглехидрати. Според содржината на хранливи компоненти можна е поделба на три категории:

• овошје со ниска содржина на јаглехидрати може да се консумира во поголеми количини – јагоди, малини, капини, боровници, лубеница, рибизли, лимон, портокал
• овошје со поголема содржина на јаглехидрати треба да се употребува во ограничени количини – кајсии, праски и сливи.
• овошје со високи концентрации на јаглехидрати, чија употреба е ограничена – јаболка, круши, цреши, грозје, банани, смокви, манго, авокадо и ананас.

Сувото овошје и преработките во форма на компоти, џемови и слично, исто така се со ограничена употреба.

Важно е да се јаде целото овошје, нецедено, бидејќи влакната во овошјето ја намалуваат апсорпцијата на шеќерот. Во секој случај и со секоја храна, најдобро е да се јаде цело, свежо, зрело, пресно и непреработено.

Млеко и млечни производи
Овие производи се богат протеински извор и се дозволена намирница на менито на дијабетичарите.
Дозволена е употреба на сите видови млека, а најдобро е млеко со помал процент на маснотија (2,8 проценти, 1,6 проценти или 0,5 проценти).
Од млечните производи најкорисни се оние од кравјо млеко и млади сирења, бидејќи содржат белковини.
Јогуртот, диеталните овошни јогурти и кефирот имаат одредена предност над чистото млеко.
Употребата на стари и зрели сирења, како и на кашкавал, треба да се ограничи.
Дијабетичарите би требало во текот на денот да земаат околу половина литар млеко, јогурт и други млечни производи.

Месо, месни производи, риба и јајца
На менито се дозволени сите видови месо. Предност има младото и немасно месо. Месните преработки не се препорачани за употреба.
Болните од дијабетес можат да консумираат секаков вид морска храна, сопрепорака за речна и морска риба како ослич, бакалар, скуша, лосос и пастрмка. Да се избегнува консумирање пржена риба и преработки од риба.
Дијабетичарите може да јадат до 2 јајца неделно или 4-6 белки. Во диететската исхрана кајганата треба да се прави секогаш во однос 1:1 (едно јајце+една белка, две јајца+две белки) подготвени без зејтин.

Масти
Мастите се главен извор на енергија за дијабетичарите. Важен е видот на мастите, како и количeството. Предност се дава на ладно цедените масла, пред сè на маслиновото масло. Поретко може да се користат и цврсти масла како што е путерот.

„Јадењето премногу маснотии може да доведе до покачување на телесната тежина, и со тоа за подолг период може да го направи потешко контролирањето на нивото на шеќер во крвта“.

Алкохол и безалкохолни пијалаци
Алкохолот не е препорачлив, но може да биде дел од секојдневното мени под услов да се консумираат минимални количини.
Внимание: Никогаш не консумирајте алкохол на празен стомак. Алкохолот консумиран на гладно може да предизвика хипогликемија (пад на шеѓер во крвта)!
Безалкохолните пијалаци содржат различни концентрации на шеќер и имаат големо енергетско оптоварување, па поради тоа треба да се употребуваат со големо внимание.

Кафе и чаеви
Иако кафето е омилена напивка која се пие и во поголеми количини, за дијабетичарите дневно е препорачливо две шолји „средно јако“ турско кафе без шеќер.
За користење овошни и билни чаеви од нашите простори нема ограничувања. Јаките чаеви како црн, индиски и руски треба да се консумираат контролирано поради високите концентрации на кофеин!

Мотивот пред сè!
Диететската исхрана подразбира промена на животните навики во однос на изборот на храна и количината која е дозволена. Поради ова, мисијата на ваквата промена и не изгледа невозможна. Создавањето на здрави навики можеби е најтешкиот дел од работата, но ако со тоа станете господар на своето здравје, ќе имате мотив кој ќе ви помгне да истраете.

The post ДИЈАБЕТЕСОТ И ИСХРАНАТА appeared first on Аптеки PlusPharma.