Во карантин или не, домот е местото на кое со задоволство му се враќаме. Тоа е катче кое треба да нѐ ослободи од стресот што го акумулираме однадвор. Но, за да ви ги наполни батериите со позитивна енергија, погрижете се да не е токсичен.

Загубете се меѓу зборови
Истражувањето на University of Sussex откри дека читањето го намалува нивото на стрес за неверојатни 68% – исто така го забавува срцевиот ритам, олабавувајќи ја тензијата во мускулите.  Затоа, одберете агол од која било просторија во домот и претворете ја во катче за читање. Сместете фотелја, фрлете едно кебенце во неутрален тон, ставете ваза со сушена лаванда и наредете неколку книги на подот.

Самата реорганизација на книгите, понекогаш е доволна за да креирате атмосфера што повикува на читање.

Поканете ја природата во домот 
Длабоката врска помеѓу луѓето и природата која е клучна за човековиот опстанок и благосостојба е и повеќе од легитимна. Затоа, актуелен е биофилија дизајнот или дизајн која ја имитира природата. Опкружување во кое се интегрирани екстериерот и ентериерот. Ваквиот дизајн особено се применува во канцелариите со цел да се зголеми продуктивноста и да се намали стресот меѓу вработените. Уште не ви е јасно! Канцеларија со вистинско дрво на средина или зелен ѕид креиран од вистински растенија. За почеток, претворете го балконот во мини џунгла.

Сте чуле ли за Воздушни цвеќиња? Потребен им е само воздух за да преживеат, а одлично ќе ги украсат челните ѕидови во дневната.

Технологијата зад врата
Психотерапевтот Nancy Colier во својата книга The Power Of Off, вели дека начинот на кој луѓето ја користат технологијата подразбира мозок оптоварен со безброј мисли, но минимум размислување. Во превод, рационалното и продуктивно размислување е сведено на минимум. Решението? Не толку „паметни домови“. Приклучете го телефонот да се полни во ходник и тетирајте го како да е фиксен; лаптопот сместете го на маса како да е десктоп компјутер. Идејата е да ја сместите технологијата на места кои ќе ве принудат свесно да одлучите дали ќе ја користите. Нејзината употреба нека ви стане избор, а не навика.

Прочистете го воздухот природно
Истражувањето на Imperial College London откри дека загадувањето на воздухот ги брише сите придобивки стекнати преку спортување, особено оние што се однесуваат на белите дробови и срцето. Не залажувајте се дека сте безбедни дома – хемикалиите, гасовите и бактериите се заглавуваат по ходниците, најмногу во зградите, а тоа значи дека воздухот може да биде 5 пати позагаден во споредба со оној надвор, тврди СЗО. И тука на сцена настапуваат цвеќињата кои го прочистуваат воздухот. Алое вера, продуцира кислород во текот на ноќта; Ѓаволскиот бршлен го отстранува формалдехидот и бензенот во воздухот.

27% се зголемиле пребарувањата, на Pinterest, за растенија кои го прочистуваат воздухот

The post Вашиот дом – Нов велнес центар appeared first on Аптеки PlusPharma.

Повеќе или помалку, одговорите на овие прашања ги имаат никој друг туку децата. Во повеќе истражувања во кои биле вклучени илјадници семејства, децата биле запрашани: „Ако можете да изберете остварување на само една желба за вашите родители, што би било тоа?“ Она што децата најмногу го посакувале е: нивните родители да бидат среќни, да дојдат дома помалку изморени и да поминат што повеќе време заедно.

Малите нешта
За едно семејство да биде среќно, зависи од сите негови членови, но најмногу од родителите, особено кога децата се мали. На благосостојбата во домот влијае тоа како родителите ќе се однесуваат меѓу себе (со почит, разбирање и  без караници), како ќе ги воспитуваат децата и како и колку ќе го поминуваат слободното време со нив.

Среќата не е нешто надвор од нас, среќата е наше право. „Малите тајни“ на среќните семејства нека бидат и ваши.

Чести заеднички оброци
Jадењето заедно не треба да биде формален и сериозен настан. Напротив, треба да биде забавно и различно од секојдневната рутина, за децата да го запомнат и да се потсетуваат кога ќе бидат возрасни. На пример, заменете го вообичаениот појадок со вечера, или викенд утрата поминувајте ги во кревет со омилениот цртан филм. Вклучувајте ги децата што повеќе во домашните обврски, на пример во подготовката на јадењата. Семејствата коишто јадат заедно на иста маса имаат подобра меѓусебна врска. Времето за оброци е време за поврзување и не треба да биде изоставено барем петпати неделно.

Поминете време за забава
Одредете некоја семејна игра и играјте заедно, барем неколкупати неделно. За помалите деца, тоа може да биде читање приказни, а за поголемите деца – некој спорт на отворено.

Намалете со вон наставните активности
Сè поголем број деца имаат 3-4 и повеќе активности по училиштето, учат неколку јазици, тренираат неколку различни спортови… Па така, и тоа малку време по работниот ден што останува за дружење, всушност, исчезнува. Пробајте да исклучите барем една активност, и тоа време искористете го за семејно дружење, како одење на базен заедно, возење велосипед или прошетки на отворено.
Најдобро е ако децата можат и сакаат да бидат вклучени во планирањето на својот ден, недела, месец, иднина. Заедничкото поставување неделни цели и, потоа, оценувањето на сработеното, кај децата развива поголема когнитивна контрола врз сопствениот живот (поголема самоконтрола, способност да ги согледаат добрите и лошите страни на изборите што ги прават и сл.).

Зборувајте за семејната историја
Важно е новите поколенија да знаат за постарите членови на семејството и за семејната историја. Споделувањето приказни од минатото, случки, авантури, посетата на баба и дедо и сл. им дава чувство на децата дека припаѓаат на нешто поголемо од нив самите. Им дава поголема контрола врз сопствениот живот, им ја зголемува самодовербата и вербата дека нивните семејства функционираат.
Дури и модерната технологија може да ви помогне да се зближите како семејство. „Како си?“ или „Те сакам“пратени преку порака многу ќе му значат на вашето дете.

Семејството пред пријателите
Кога децата се поголеми и одат на училиште, по работниот ден седнете со нив и распрашајте ги за тоа како го поминале денот, и споделете со нив некоја интересна случка од вашиот ден. Ставете го семејството на прво место. Бидете позитивни и насмеани, затоа што поради вашата незаинтересираност за нив и поради вашето нерасположение, децата може да посакаат повеќе време да поминуваат со своите пријатели и надвор од домот. Пријателите се важни, но семејството треба да биде на прво место.

Создавајте ритуали
Создадете ритуал, активност што ќе ја повторувате и поради која ќе мора да се дружите. Може да биде за одредени празници или за викенди, филмска вечер еднаш неделно, правење палачинки, играње карти, домино, монопол и сл.

Бракот на прво место
Среќно семејство е она во кое неговите членови се среќни, што особено важи за родителите т.е. за сопружниците, кои се и креатори на случувањата во семејството. Избегнувајте кавги особено пред децата. Заљубеноста поминува, но љубовта останува, и таа треба да се храни и да се одржува за да се задржи блажениот однос меѓу сопружниците.
Бидете пример за љубов. Вашата врска и вашиот брак треба да бидат на прво место. Во спротивно, сета љубов и вниманието се префрлаат на децата, што може да биде преголем товар за нив. На крајот на краиштата, ќе дојде време кога децата ќе го напуштат домот.

Комуницирајте дури и за најмалите работи
Децата, генерално, се раѓаат среќни, а учат за тага. Ги повторуваат вашите постапки и емоции – така учат. Ова не значи дека треба постојано да бидете насмеани или да глумите некоја друга личност. Но, ако се радувате што ги гледате своите деца, и тие ќе се радуваат кога ќе ве видат вас.
Една од причините за среќа се финансиите и заедничкото донесување одлуки за инвестиции во домот. Доколку буџетот е малку „тенок“, наоѓањето решенија треба да се направи заеднички. И, како што се препорачува, секој од сопружниците да го задржи својот идентитет во бракот. Така, не е „на одмет“ секој да си тргне настрана нешто ситно за задоволување на некои свои каприци.

Комуникацијата меѓу сите членови на семејството е многу важна. Вообичаено, мајката е таа со која сите комуницираат и која ги пренесува информациите. Но, во среќно семејство, сите членови комуницираат меѓусебно, и отворено се зборува за сè.

За да бидеме среќни сега, можеби треба барем малку да се навратиме на навиките од минатото, кога луѓето вистински комуницираа (без телефони и таблети), кога децата играа надвор, кога гледањето цртани филмови беше нешто посебно и се правеше за викенд или на кратко пред заспивање, кога одењето „на шопинг“ значеше и дружење, а не „терапија“. 

The post МАЛИ НЕШТА ЗА СРЕЌНИ СЕМЕЈСТВА appeared first on Аптеки PlusPharma.