Дали оризот треба да отстои во вода преку ноќ? Пожелно е, но не мора, сепак оризот не е наут. Но, според експертите од Универзитетот Квинс, оризот може да содржи арсен кој пак предизвикува низа срцеви заболувања, дијабетес и рак. Добрата вест е тоа што откако оризот ќе отстои во вода преку ноќ, нивото на овој штетен токсин паѓа за цели 80 %. Истиот ефект ќе го постигнете ако го варите оризот во повеќе вода – 5 шолји вода за 1 шолја ориз – за да ја преполовите количината арсен.

Дали кога сум на диета е подобро да пијам исклучиво црно кафе? Многу веруваат во заблудата дека црното или турско кафе е диетална варијанта во однос на другите кои содржат млеко. Млекото воопшто не поттикнува апетит ниту води до вишок килограми. Ако работата ви е стресна, поголема е веројатноста кафето (без разлика каков тип пиете) да ви донесе вишок, а не минус килограми. Зошто е тоа така? За сѐ е виновен стрес хормонот кортизол чие ниво расте под влијание на редовните дози кофеин. Друг момент е шеќерот во крвта кој се искачува, а потоа нагло паѓа поттикнувајќи ве да јадете и солено и благо во исто време. Ова не значи дека целосно треба да се откажете од кофеинот, но кога сте на диетален режим пијте го пред или веднаш после оброкот.

Вистина ли е дека препечениот сладок компир предизвикува рак? Одамна важи правилото дека храната не смее да се препекува, бидејќи онаа црна кора е канцерогена. Нутриционистите особено алармираат да внимаваме на тоа како ги готвиме скробните намирници. Тостираните и препечени компири, вклучувајќи го и слаткиот, го зголемуваат ризикот од рак поттикнат од компонентата позната како акриламид – се создава кога водата се губи од површината на плодот во текот на печењето. Сепак, не постои директен доказ дека акриламидот е канцероген за луѓето. Што значи, уживајте во печени компири, но  сепак гответе ги на најздравиот можен начин – крупни парчиња печени на пониска температура за пократко време.

Колку црвено месо е дозволено да се јаде? Црвеното месо го бие лош глас, особено меѓу возрасните. Но, последните студии велат дека три порции од 85 грама неделно, не го зголемуваат ризикот од кардиоваскуларни болести. Од друга страна, црвеното месо содржи витамин Б, цинк, селен и железо кое телото многу подобро го апсорбира во однос на железото од растително потекло.

Знајте го ова… Студијата објавена во магазинот Social Science and Medicine, откри дека секојдневното читање во траење од 30 минути го продолжува животот за цели 2 години. Читањето го ангажира мозокот на подлабоко ниво и води до подобрена емпатија, социјална перцепција и емотивна интелигенција – квалитети неопходни за подобро преживување. Еј, ова важи само за печатените книги, читањето на телефон не се важи.

Трчање кога надвор е загадено –  носи повеќе корист или штета? Изложувањето на загаден воздух е штетно без разлика дали пешачите или трчате. Но, при трчање човекот дише подлабоко полнејќи ги градите со 10 до 20 пати повеќе воздух. Ова автоматски значи дека вдишувате поголема количина од штетните честички кои предизвикуваат срцев или мозочен удар. Пред да се затворите дома, знајте го и ова: Истражувачите од Универзитетот Кембриџ потврдија дека бенефитите од спортувањето (вклучувајќи го и трчањето) дури и во земјите со високо загаден воздух, ги надминуваат ризиците. Па, по некоја логика добро е да трчате и кога е екстремно загадено, но трчајте во парк или шума место на асфалт.

The post Интересни Прашања Научни одговори appeared first on Аптеки PlusPharma.

На сите ни се има случено, денот да го поминеме пред компјутер, а ноќта да ја поминеме залудно броејќи овци. Несоницата е чест сопатник на преморот. Шансата да ја поправите штетата се крие во појадокот. Истражувањето објавено во весникот „Food“ откри дека каротеноидите (како лутеинот), присутни во жолчките, можат да го поправат квалитетот на сонот. Истовремено, тие го бришат уморот видлив на регијата околу очите и штитат од главоболка. Плус, штом ги проголтате, антиоксидантите се конвертираат во витамин А – клучен за долгорочно здравје на очите. Но, внимавајте на начинот на подготовка на јајцата, при пржење скоро се преполовуваат каротеноидите. Најдобрата опција е меко варено јајце.

Знајте го ова…

78 е процентот на учесници во една студија кои добиле изгореници од сонце, бидејќи користеле само чадор како заштита од УВ зраците. Од оние кои користеле СПФ, само 25 % се соочиле со изгореници, се вели во студијата објавена во весникот „Jama Dermatology“.

Дали е можно да имам киселини поради неправилно седење?

Пецкањето во грлото или народно кажано „киселини“, научно се нарекува Гастроезофагеална рефлуксна болест (ГЕРБ) која настанува кога желудочната киселина навлегува или се враќа во хранопроводот или во усната празнина. Алкохолот, зачинетата храна и кафето се топ три предизвикувачи на оваа состојба. Но, диететичарот Helen Barrеt тврди дека и самото држење на телото може да ја поттикне оваа состојба. „Ако постојано сте стуткани или згрбавени пред монитор и го потиснувате стомакот, киселините лесно ќе се качат до устата. Ваквиот проблем не смеете да го игнорирате во случај да зачести, бидејќи најлошото сценарио гласи: рак.“ 

Кое е најздраво масло за готвење?

Во однос на калории, маслата се слични – околу 120 калории во една супена лажица. Но, секое има свои особености, па добро е да ги ротирате во исхраната.

Маслиново масло– Ќе ви помогне да го намалите лошиот холестерол и крвниот притисок и да ги редуцирате воспаленијата. Екстра девственото маслиново масло е побогато со антиоксиданти и антивоспалителни хранливи материи.

Масло од грозје– Богато со витамин Ц и Е, бета-каротен, антиоксиданти кои штитат од слободни радикали.

Кокосово масло– Една супена лажица содржи околу 13.6 г масти, 12 г од нив се заситени. Но, некои од овие „лоши“ масти се тип лауринска киселина која го поттикнува имунитетот и ги убива лошите бактерии. Во суштина не е лош избор, но ако не го користите секојдневно.

Масло од авокадо– Содржи големи дози на витамин Е и е вистински благодат за здравјето на усната шуплина: докажано одлична превенција од парадентоза. 

Дали е подобро да вежбам сама или во група?

Една нова студија тврди дека вежбањето во група не само што ќе ви донесе поголеми и побрзи резултати, туку ќе ви ја поправи и психата. Во 12-неделната студија, која била спроведена меѓу студентите на „University of New England“во САД, се вели дека групните фитнес сесии во траење од 30 минути, за само една недела успеале да го намалат стресот меѓу испитаниците за 26 %. Учествувањето во редовни групни фитнес сесии води до значајно намалување на стресот и зголемување на физичкиот, ментален и емотивен квалитет на животот во споредба со вежбањето насамо или нередовно вежбање.

За најдобра превенција од брчки околу очи, дали треба да ги нанесувам кремите и наутро и навечер или доволно е само навечер?

Бидејќи кожата околу очите е тенка, а ги користиме фацијалните мускули цел ден (трепкаме, се смееме, замижуваме на сонце) добро е да нанесувате крем во неколку слоеви и тоа наутро и навечер. Одберете производи кои се наменети за вашиот конкретен проблем и нанесувајте ги според густината стартувајќи со најмалку густиот. За преку ден ви треба формула која содржи витамин Ц за да ве штити од слободните радикали и антиоксидант како витамин Е. За навечер, задолжително нанесете го кремот еден час пред спиење за да има доволно време да се апсорбира, одберете хидратантна формула на база на ретинол.

The post Интересни прашања – Научни одговори appeared first on Аптеки PlusPharma.

Може ли да јадам карфиол секој ден?
Да, особено ако го комбинирате со доволно протеини. Обично е актуелен во зимскиот период, но карфиолот заслужува постојано да биде присутен на менито, бидејќи неговите нутритивни придобивки ги ставаат во сенка и оние на актуелниот кељ. Најдобро од сѐ? Невозможно е да се предозирате од карфиол ипо цена да го јадете секој ден. Содржи многу малку калории и делува антивоспалително–што го прави одлична замена за јаглехидрати.
Ти не си ти, кога си гладен! Мит или факт?
Најновите истражувања велат: ФАКТ! На празен стомак, поголема е веројатноста ситуациите да ги интерпретирате како негативни, бидејќи истите симптоми кои сигнализираат глад (потење, кркорење на цревата), исто така сигнализираат и нервоза. Решение: пред да експлодирате поради нечиј коментар или однесување, избројте до 10 и запрашајте се дали би биле толку нервозни ако бевте сити? Ако сте на работа, практикувајте да консумирате ужини богати со протеини и растителни влакна на секои 3 часа. Пропуштивте оброк? Истата комбинација ќе го стабилизира организмот, но и умот за брзо време.

Возможно ли е да станам утрински човек? – И додека вие сѐ уште се тркалате во кревет борејќи се со сите сили да станете, вашиот познаник веќе појадуваше, вежбаше, се тушираше и тргна на работа. Не обвинувајте се, не е до вас, туку до гените кои недолжни ги наследивте. „Секој човек поседува генетски детерминиран хронотип“, објаснува Барбара Хелм, професор на „Универзитетот на Гронинген“ во Холандија. Ова е научниот одговор за целиот оној концепт наречен „утрински тип на човек“кој зависи од она што се нарекува деноноќен ритам. Некаде помеѓу 23.7 и 24.7 часови, ритамот одредува кога температурата на телото ќе се покачи пред да се разбудите, а тоа зависи од низа фактори, како возраста и полот. Со ова се објаснува зошто малите деца се будни во 5 часот наутро, додека тинејџерите не можат да се освестат до пладне, додека вашиот познаник е некој вид на суперхерој. Невозможно е да го смените наследениот хронотип, но можете да го унапредите. На пример, светлото најмногу влијае на телесниот часовник. Не спијте со спуштени ролетни за порано да станете. Легнете си порано, за да станете порано. За да го подобрите квалитетот на сонот и вистински да се одморите за помалку часови, ќе ви помогне магнезиумот.

Дали ако ги скријам слаткото и грицките, полесно ќе им одолеам?
Голема е веројатноста да ви успее ваквата „криенка“! Студијата на Универзитетот „Дјук“,Северна Каролина, откри дека изборот на ужините во голем дел зависи од тоа каде тие се сместени во кујната. Учесниците во студијата, двојно повеќе, ги одбирале здравите опции како банана, портокал, пуканки, кога тие стоеле до чоколадата, бисквитите и чипсовите. Време е за преуредување, зар не?

Дали позитивниот став носи позитивен ден?
„Мисли позитивно“ – совет кој со леснотија го кажуваме, но не го применуваме. А, што кога ќе го чуеме? Па, попрво ќе превртиме со очите, наместо сериозно да се потрудиме да ги насочиме мислите во плус. Но, дали би се исплатил трудот? Истражувањето објавено во „The Journals Of Gerontology: Psychological Sciences“откри: ако единственото нешто што го очекувате од денот е тоа да биде стресен, несомнено ќе бидете помалку продуктивни – без разлика на тоа каков ќе излезе на крај. Во период од две недели, испитаниците одговарале на прашања околу нивните нивоа на стрес и изведувале мемориски задачи во текот на денот. Истражувачите откриле врска помеѓу високите стрес-прогнози што ги дале испитаниците и нивната оскудна меморија во текот на денот. И тоа, не зборуваме за неможноста да се сетите што се случи во последната епизода на ТВ-серијата што ја гледате, туку за слаба работна меморија којашто ќе ви донесе неред во работата. Со други зборови: мисли позитивно за да делуваш продуктивно!

Знајте го ова…
Потребна е само една непроспана ноќ, за да поттикнете загуба на мускулите кои едвај ги стекнавте. Од друга страна, менталниот одмор по работа, како листање списание или дружење со децата, ќе ви помогне да заспиете без проблем.

The post Интересни прашања – Научни одговори appeared first on Аптеки PlusPharma.

А, зошто не и двата? Но, ако ве интересира кој предничи во однос на нутритивните вредности, тогаш слаткиот е во мала предност. Подеднакви се кога станува збор за витаминот Б6 и железото, според анализите на Џо Холингтон– диететичар и основач на „Нутришн ми“ (Nutrition Me). Обичниот компир е во предност во однос на витаминот Ц и бројот на калории (146 калории во 170 г во однос на 130 калории), но слаткиот содржи плус витамин А. Влакненцата во лушпата на слаткиот компир се доказ дека има понизок гликемиски индекс, што го прави одличен снабдувач на бавно-ослободувачка енергија. Ова важи без разлика колку и како го готвите.

Дали навистина ми треба и дневен и ноќен крем?

Да, бидејќи кожата има потреба од различни активни состојки навечер и преку ден. Дневната крема треба да содржи СПФ и антиоксиданти кои ќе војуваат со загадувачите и ќе го контролираат црвенилото. Ноќната крема треба да работи на проблемите со кои се соочува кожата, како сувост, темни дамки, знаци на стареење.

Зошто во зима ми се јаде висококалорична храна?

Виновни се хормоните! Тие се под силно влијание на сончевата светлина, па штом почне порано да се стемнува, нивото на серотонин (хормонот одговорен за среќата) почнува да опаѓа. Консумирањето храна богата со јаглехидрати го поттикнува неговото лачење. Поточно, јаглехидратите го поттикнуваат лачењето на инсулинот, кој, пак, ја конвертира аминокиселината триптофан во серотонин. Од овие причини, човекот несвесно преку храната се обидува да се расположи. А сега кога веќе знаете, одбирајте јаглехидрати со цело зрно, а оризот нека биде кафеав – потребно е подолго време за да се дигестираат, додека лачењето на глукоза во крвта се одвива порамномерно. На овој начин, нема да се соочите со нагло покачување на шеќерот во крвта, а ќе имате корист од бавното ослободување енергија.

Дали преморот е реален?

Едно е сигурно – преморот може да ве остави без сон! Исцрпеноста се случува кога телото и умот не се синхронизирани: ментално сте истрошени, но, физички, телото не е доволно уморно за да потоне во сон. Вежбањето може да помогне, бидејќи на тој начин телото ќе се ослободи од адреналинот насобран во текот на стресниот ден лачејќи аденозин. На овој начин, всушност, ќе му помогнете на мелатонинот (хормонот одговорен за спиење) да биде поефикасен. Заборавете на идејата за чаша вино, алкохолот го компромитира длабокиот сон.

Црвена, кафеава или зелена леќа?

Која ви е највкусна – таа, само да е леќа. Новите истражувања велат дека доволно е половина чинија ориз да замените со леќа, за да го намалите шеќерот во крвта за 20 %. Овој зеленчук кој е екстремно богат со влакна и протеини, ја забавува дигестијата и ослободувањето на шеќерот, правејќи ве сити подолго време и намалувајќи го ризикот од дијабетес.

Ладен туш или топла бања – што е подобро по вежбање?

Зависи што сте вежбале! Ако сте изведувале вежби за издржливост, да речеме маратон, парната бања е одлична за истрошените мускули експресно да си ја вратат силата. Ако имате слаби точки кои ве изневеруваат во текот на тренингот, на пример, тетивите или половината, топла облога би ја подобрила циркулацијата. Но, за итна превенција од болки, бодежи, треперење во слабите точки, ставете кеса со лед за да спречите отекување или здрвување – особено на колената, колковите, зглобовите. Само што завршивте со кросфит-тренинг или трчавте спринт? Појдете под ладен туш. При интензивни и краткотрајни тренинзи, студената вода е во функција да ја насочи крвта во центарот на телото и на тој начин да ги стопли органите. Штом излезете од туш, крвта екстра брзо ќе се врати кон екстремитетите за да ги лекува и да ги опушти. За ладен туш се резервирани максимум 15 минути, поделени во интервали од по 3 минути.

The post Интересни прашања – Научни одговори appeared first on Аптеки PlusPharma.