• Истражувањата покажуваат дека себеприфаќањето е фундамент на целокупното ментално здравје и добросостојба.
• Постои директна конекција помеѓу ниското ниво на себеприфаќање и менталните болести.
• Преку себеприфаќањето човекот полесно ги контролира своите емоции и го зголемува својот капацитет да биде среќен, бидејќи ќе научи како да си ги прости грешките.
• Кога човекот не се прифаќа себеси во целост, тој како да живее во лага, како постојано да игра криенка, па се цензурира себеси и го потиснува своето вистинско „јас“, а тоа сериозно многу истоштува.
• Себеприфаќањето му помага на човекот да се претстави себеси во автентично светло без да води сметка што мислат другите за него.

Поставете цели

Наведете неколку реални цели за себе и направете план да ги исполните (и ова ќе ви помогне да ја зголемите самодовербата). Не заборавајте да се наградите себеси штом исполните некоја цел.

Славете ги вашите достигнувања

Направете листа на се што сте постигнале и редовно допишувајте ги новите подвизи. Ставете ја листата на некое видно место за редовно да ја гледате. Бидете горди на себеси!

Планирајте однапред

Колку што е можно, избегнувајте ги ситуациите и/или луѓето кои го загрозуваат вашето себеприфаќање. Меморирајте неколку мисли што ќе ви служат како водилка, а најмногу ќе ве одвлекуваат од помислата да се сомневате во својата вредност.

размислувајте позитивно

Запомнете, со себеси однесувајте се со почит и потрудете се негативните мисли и критицизмот да ги претворите во позитивни мисли. Не бидете престроги кон себе и не споредувајте се со другите.

бидете љубезни кон себе

Смислете неколку специјални третмани за себе со цел да поминете квалитетно време насамо, со своите мисли (на пример, подгответе си топла купка или појдете на прошетка во природа). Многу е важно да се грижите за себе така што ќе се храните здраво, ќе спиете доволно и редовно ќе вежбате.

Вклучете се

Волонтирајте, појдете на некој курс, побарајте втор ангажман со половина работно време, обидете се со каква било кативност после работа за подобро да се запозаете себеси, да сфатите во што уживате и во што сте најдобри.

Побарајте поддршка

Секогаш кога можете споделувајте ги своите емоции со луѓето на кои им верувате, како пријателите и семејството. (Штом соберете храброст, прашајте ги што е она што им се допаѓа кај вас.)

The post Како себеприфаќањето влијае на секојдневието? appeared first on Аптеки PlusPharma.

Некои достигнувања во животот се јавни.

• Освојување награда.
• Унапредување на работа.
• Признание за вашата хуманост.

Секој облик на вреднување му годи на карактерот. Секоја афирмација ја надградува самодовербата.

Но, тука се и оние интимни достигнувања, оние мали победи што ги освојуваме во себеси благодарение на кои стануваме подобри луѓе. Иако никој не ги посведочил и не сме добиле аплауз за нив, несомнено се поважни од кој било материјализиран успех.

Нема посилна победа од победата над себеси. Човек навистина тешко се менува и вистинско задоволство е кога одеднаш ќе станете свесни дека сте успеале во тоа.

Мудроста е најмоќна да го промени човекот. Лекциите што ги учиме низ животот се оние кои нѐ мотивираат да правиме разлика меѓу она што е добро за нас и она што не е. Или она што во нашиот нарав нѐ уназадува во напредокот и она што нѐ води напред.

Постарите луѓе милуваат да кажат: „Посакувам да ги имав твоите години, а овој памет!“ Оваа изјава се чини дека најдобро ја отсликува долгогодишната борба што секој човек ја води со себеси.

Но, токму мудроста ја прави староста посебна. Колку и да делува страшна, староста е етапа од животот кога човекот конечно е во мир со себеси.

Клучното прашање е: Дали е возможно барем малку да ја поместиме возрасната граница кога конечно ќе го почувствуваме тој мир? Со многу работа на себеси, возможно е!

Клучно во целиот процес е да се прифатите себеси во целост. Грешите ако мислите дека себеприфаќањето е автоматски одговор, напротив – не е! За да дојдете до тоа, потребно е многу работа и труд.

Прифаќањето на добрите работи кај себе е лесна задача, но што е со останатите? И дали воопшто треба да ги прифатите своите мани и слабости?

Всушност, токму тоа треба да го сторите!

Суштината на себеприфаќањето е да научите да се сакате себеси, однадвор и однатре.

Прифатете го она што ве прави посебни

Размислете што е она што ве прави посебни. Размислете како овие посебности може да го направат вашиот живот повреден и како би можеле да имате корист од нив.

Откажете се од нештата што не можете да ги промените

Погрешно е да се фокусирате на нештата што не можете да ги промените. Ќе ви биде од помош ако на лист хартија напишете писмо до себеси во кое ќе се збогувате со нештата кои не можете да ги смените, а ќе им посакате добредојде на оние особини што ги сакате кај себе. Нагласувајќи го доброто, порано или подоцна, лошото ќе го потиснете.

Идентификувајте ја својата сила

Напишете ги нештата во кои сте добри и кои сакате да ги правите (на пример: спортување, музика, уметност и слично). Редовното практикување и усовршување на овие капацитети ќе ви ја поткрене самодовербата во однос на можностите што ги поседувате.

The post Себеприфаќање appeared first on Аптеки PlusPharma.

Успехот го следи оној што ќе успее да го победи стравот и да истапи надвор од сигурната зона што самиот ја создал. Количината на среќата во нашиот живот зависи од тоа колку знаеме да управуваме со стравот и нашата ранливост. Прост пример, ако не ве унапредија кога бевте сигурни дека ќе го сторат тоа, не чекајте да се сетат, вие отворете ја темата.

Но, полесно е да се каже отколку да се стори, нели? Затоа секогаш кога сакате да смените нешто, но стравот ве кочи, прелистајте ги низ глава следниве чекори смислени од група психолози. Нема послатка победа од онаа извојувана со преземен ризик.

„Нема послатка победа од онаа извојувана со преземен ризик“

ОТКРИЈТЕ ГО ВАШЕТО „ЗОШТО“

Си поставивте цел, но ви недостасува мотивација. Дали сте 100 % искрени со себе? Да претпоставиме дека мисија ви е да ослабете, но зошто го правите тоа? „Сакам да бидам поздрава“ – е изјава во која никој нема да ви поверува, а најмалку вашиот мозок. Одговорот треба да биде реален, бидете искрени со себе и така ќе дојдете до мотивација. Дали вистината гласи: „Сакам да ме собере во старите фармерки?“ Или едноставно ве исплаши згоеноста и последиците што таа ги носи, а кои во моментов ги живее некој ваш близок? Без разлика на одговорот, она што треба да го научите е следното: Никогаш нема да излезете на крај со „КАКО?“ или со тешките задачи што треба да ги сработите за да дојдете до целта, доколку не почувствувате длабока и емотивна врска со „ЗОШТО ГО ПРАВАМ СЕТО ОВА?“

НАДМУДРЕТЕ ГО СТРАВОТ

Насетете го вистинскиот предизвик така што ќе се обидете да го смислите исходот. Замислете три можни сценарија: (А) Не правите ништо, (Б) Преземате акција, но завршува лошо или (В) преземате акција и успевате. Да претпоставиме дека сакате да зборувате со претпоставениот на работа околу вашиот напредок во фирмата – нова позиција и/или покачување на платата. Сценариото под А вели дека ќе се исплашите и ќе се премислите од целата идеја за соочување со претпоставениот. Но, молчењето само ќе го разгори вашиот гнев и ќе резултира со стариот страв зад кој реално се крие ОТКАЗ. Во сценарио Б разговарате на темата, но не го добивате одговорот што го сакавте. Во ред, барем сега знаете дека ставовите ви се разликуваат, па слободно можете да им се посветите на другите ваши можности во или надвор од таа фирма. И последното, во сценарио В разговарате со претпоставениот и веќе ја преуредувате новата канцеларија.

БИДЕТЕ ПОПУСТЛИВИ СО СЕБЕСИ

Што обично правите кога детето или внучето одбива да ве слуша? Свесно демонстрирате лутина пред детето и отворено му покажувате дека сте бесни. Воспоставувате систем на наградување, па за секоја послушност го наградувате детето со некое ситно задоволство. Овие два примера се всушност шаблоните по кои треба да се третирате себеси, значи секогаш третирајте се себеси како што ги третирате личностите што најмногу ги сакате. Постојано одложувате да го проследите курсот што ви е неопходен за да напредувате во работата. Дури ви забележаа и колегите. Заклучивте дека мора да се казните себеси и викендот да го поминете дома. Но, се залажувате себеси ако мислите дека со внимание и концентрација ќе го следите и ќе научите нешто од курсот. Напротив, незадоволно ќе размислувате што прават другите и голема е веројатноста денот да го поминете непродуктивно. Зошто да не постапите обратно? За секое преслушано поглавје од курсот почестете се со едно брзо кафе или опуштете се со вашата омилена ТВ серија. Сакајте се себеси, почитувајте ги своите реални можности и ќе напредувате на секое поле.

The post Комфорна зона appeared first on Аптеки PlusPharma.

ОГРАНИЧУВАЊАТА ЈА ХРАНАТ КРЕАТИВНОСТА

Неудобноста: Што имаат заедничко режисерот Стивен Спилберг, импресионистите и светски познатиот архитект Френк Гери?Потпирајќи се на минимум ресурси, тие создале ремек-дела. „Импресија, изгрејсонце“ на Клод Моне, никогаш немала да стане ремек-дело доколку тој не се ограничил да слика само со неколку бои и потези со четката. Филмот „Ајкула“ на Спилберг ги постави границите на модерната кинематографија, иако режисерот морал да импровизира за да го долови нападот на ајкулата (со помош на звучни ефекти), бидејќи неговата механичка ајкула се скршила во текот на снимањето. Френк Гери, пак, единствено не можел да дизајнира згради на бел лист хартија и слобода во изразот. Недостигот на ресурси носи неудобност. Но, честопати токму тоа е потребно за да изведете оригинални дела.

Доказ: Студијата на„Универзитетот на Амстердам“тестирала како ограничувањата влијаат на луѓето когнитивно. Истражувачите ги замолиле испитаниците да слушаат серии на зборови и бројки додека изведуваат комплицирани задачи. Резултатите? Ограничувањата го смениле начинот на кој размислуваат студентите. Нивниот дијапазон на размислување, од локален, преминал во глобален. Наместо кратковидно, тие почнале да ја гледаат поголемата слика.

Задача: Намерно поставувајте си ограничувања. Скратете го времето кое вообичаено го трошите за одредена задача, намалете го бројот на луѓето кои ги викате напомош или ограничете ги ресурсите, сведете ги на еден до два. Колку и да е непријатно, можеби токму тука се крие одговорот на брилијантната идеја што тлее во вас.

НЕУСПЕХОТ ПРИВЛЕКУВА ИНВЕНТИВНОСТ

Неудобноста: Повеќето од нас се израснати со идејата дека неуспехот е нешто што треба да го избегнуваат по секоја цена. Резултатот од ваквото уверување е култура со вкоренет страв од неуспех. Но, стравот од неуспех е најголемата стапица за успехот, бидејќи плашејќи се да не потфрлите, вие не напредувате.

Доказ: Компанијата за производство на автомобили, „Тојота“, успешно функционира водејќи се според неуспехот. Кога вработениот ќе забележи каков било недостаток, тој сигнализира и производството на лентата запира. Доколку проблемот не може да се реши за една минута, тогаш севкупното производство сопира сѐ додека не се реши проблемот. Ваквата константна проценка и за најмалите недостатоци е доказ дека ситните, но клучни, унапредувања го трасираат патот до совршенството.

Задача: Постојат два типа неуспех. Неуспех кој потекнува од мрзеливост и недоволно грижа, тој е оној лошиот тип; и неуспех кој доаѓа од ризикување во име на инвентивноста, тоа е оној што треба да се охрабрува. Со други зборови, во секундата кога нешто ќе тргне наопаку, застанете и анализирајте. Одново и одново запрашувајте се: зошто ова се случи? Што можеше да биде направено поинаку? Што треба да се преземе за да не се повтори? Тргнете ја вината од неуспехот, за да почнете на него да гледате како шанса да стигнете до заклучок на кој никој не се сетил.

КРИТИКАТА НОСИ ПОБЕДА

Неудобноста: Никој не милува да слуша што погрешил. Никој не сака да биде ставен во позиција некому да му ги посочува грешките. Ваквиот страв е стар колку и самото човештво, станува збор за длабок инстинкт кој нѐ штити од одвојување од групата. Но, фидбекот од вистинскиот извор е најбрзиот начин да го отклучите вистинскиот потенцијал што го носите.

Доказ: Концептот на суперелитни атлети, со години, eтема на истражување на универзитетот „Бангор“ од Велика Британија.Нивните откритија? Атлетите со најдобри резултати, се оние кои не добиваат само технички фидбек, но и емотивна поддршка од нивните тренери. Со други зборови, нивните тренери се однесуваат како да се некој вид на сурогат родители – мотивирајќи ги, охрабрувајќи ги и давајќи им критички осврт за секој нивни натпревар. На пример, денес, елитните тенисери покажуваат многу подобри резултати во однос на нивните колеги од пред 50 години. Зошто? Бидејќи на сцена настапија елитните тренери – индивидуалци чија работа е да нудат постојан фидбек и поддршка на тенисерот.

Задача: Побарајте си грижлив тренер – некој кој ве познава и ве разбира доволно за да знае што вистински можете, а што не (да го советувате интровертот да биде гласен, едноставно нема да успее). Резервирајте си време за редовни фидбек-сесии, не подолги од 30 минути. Побарајте искрена критика за 3 клучни работи и бидете конкретни.

ТРАУМАТА РАЃА ПОБЕДНИЦИ

Неудобноста: Порано или подоцна, секој од нас ќе се соочи со реална и неизбежна неудобност. Можеби ќе стане збор за разделба, загуба на близок, отказ што не го предвидовте. Ваквите искуства се трауматски и, на почеток, ќе верувате дека никогаш нема да ги преболите. Сигурно веќе сте чуле за пострауматски стрес, но дали сте сте чуле за пострауматски напредок?

Доказ: Џејмс Пенебакер, социјалниот психолог и академик од „Универзитетот на Тексас“,  ја истражувал траумата речиси цела своја кариера. Неговите откритија? Оние кои водат дневник за тоа како се чувствуваат по траума, ги намалуваат докторските посети, ја намалуваат анксиозноста и го подобруваат имунитетот. Всушност, студиите покажале дека речиси две третини од луѓето кои доживеале траума, доживеале и пострауматски напредок како бенефит од претрпениот стрес.

Задача: Дневникот проверено е најдобриот начин за да ги пребродите стравовите. Чекор по чекор анализирајте што тргна наопаку. Колку повеќе ја анализирате ситуацијата, толку повеќе ќе созревате, ќе ја прифаќате и ќе научите како да се носите со неа. Стартувајте со прашањето: „Како се случи сѐ?“ Потоа, нека следи:„Зошто се случи тоа?“ На крај, завршете со: „Што можам јас да сторам за да не се повтори?“

The post Кога успехот е сигурен? – Кога на патот до него има безброј пречки, еве зошто… appeared first on Аптеки PlusPharma.

Константната фиксација на позитивни вибрации всушност нѐ оддалечува од целта. Во денешно време, како да стана забрането да се биде тажен. Но, за да бидете вистински среќни, неопходно е да направите место и за болката. Среќата не е состојба која вечно трае, ако поскоро го сфатите тоа, помалку ќе се споредувате со другите и ќе се поштедите од разочарувања на дневна база.

Па, како изгледа вистинската среќа, како побрзо да дојдете до неа и да ја уживате во големи количества? Одговорот е многу поедноставен отколку што мислите, а секој од вас веќе ги поседува магичните состојки.

Трошете ја среќата

Ако ги прашаме луѓето што би правеле со голема сума освоени пари, повеќето ќе одговорат дека би заминале на некоја егзотична дестинација или би си купиле скапи чевли – за повеќето, изборот би бил нешто материјално. Но, материјалните добра носат краткотрајна среќа, за долгорочен среќен живот, на пример, потребно е повеќе време за себе.

ВРЕМЕ
Платете некому да ја заврши обврската што ја мразите, а времето што ќе ви остане искористете го за да се видите со пријателите или да си читате книга. Сите посакуваме повеќе време и повеќе пари, а еден од триковите за среќа лежи во правилното балансирање на овие две. Кој од нас би му платил на детето на соседите да го искоси тревникот? Никој, бидејќи сме уверени дека тоа го има само на филм. Од друга страна, среќата ја поврзуваме со постигнување на целите и обврските иако за таа да настапи неопходно е да отфрлиме некои обврски од нашиот живот.

ИСКУСТВА
Кариерата ни стана ултимативен статусен симбол – работиме колку што е можно повеќе и колку што е можно подолго, целејќи кон онаа недефинирана доба во којашто ќе уживаме, ќе патуваме или конечно ќе се посветиме на нашето хоби. Парите ги доживуваме како ограничувачки ресурс, додека времето како неограничувачки, кога, всушност, е обратно. Но, човечкиот мозок е навиен да размислува за иднината, затоа не судете си што ви е тешко да живеете во сегашноста. Продолжете да правите планови и да сонувате, но ако за она патување во Париз потребни се уште многу години, појдете барем на дегустација на француски вина.

ДРУГИТЕ
За да бидете среќни, направете некого среќен – звучи познато, нели? Трошењето пари за други носи голема радост, вели Елизабет Дан, професорка по психологија на „Универзитетот на Британска Колумбија“ и коавтор на „Среќни пари: Наука за посреќно трошење“ („Happy Money:The Science of Happier Spending“). Идејата не е да нудите пари, туку да изнудите задоволство преку неочекуван подарок или гест. На пример, уплатете масажа за вас и за оној што одбравте да го усреќите, и појдете заедно.

Размислувајте низ призма на среќата

Среќата зависи од нас и од она што ќе го искористиме или направиме во дадените услови. Не е лесно да го смените начинот на размислување, но овие две навики сигурно би го забрзале процесот на прогледување со розови очила.

ЦЕНЕТЕ ГО СТАТУСОТ (ВО МОМЕНТОТ)
„Луѓето претпоставуваат дека ќе бидат среќни штом достигнат одредено ниво – финансиски, креативно, романтично“, вели Лаури Сантос, професорка по психологија на универзитетот „Јејл“. Проблемот е тоа што појдовната точка се менува. Ќе дојдете до покачување на платата и за кусо време веќе ќе мислите на следното. „Луѓето размислуваат обратно“, вели Сантос. Среќата носи успех, а не обратно. Сменете го шаблонот изразувајќи на глас за сѐ што сте благодарни.

БИДЕТЕ РЕАЛНИ
Посакувате да сте среќни 24/7? Сега е јасно зошто не ви успева. Неубавите емоции се составен дел од животот, ако ги прифатите како нормални, полесно ќе ги пребродите. Истовремено, ќе развиете и полесно достапна слика за среќата.

Негувајте ја среќата

Да претпоставиме дека сакате да одите на часови по танцување, но ако одите 5 дена во неделата цела година, најверојатно ќе ви здодеат. „Луѓето се менуваат, а со нив и активностите кои им причинувале задоволство“, вели професорката по психологија, Соња Љубомирски, која е автор и на книгата „Митови за среќа“ („The Myths of Happiness“). За да не западнете во стагнација, следете го нејзиниот план од 3 чекори:

ПРОМЕНИ
Луѓето брзо се адаптираат на константни и непроменливи услови, затоа внесувајте новитети во актуелната рутина за да ја зголемите ангажираноста. Ако милувате да готвите, наместо стандардните колачи, подгответе некој модерен рецепт како банана-леб.

ИЗНЕНАДУВАЊА
Зарем има подобро време за менување на плановите од последната минута? Спонтаноста е најефикасната алатка во арсеналот за среќа, велат истражувањата. Не велиме да ги менувате големите планови кои најверојатно некому би му го уништиле денот, туку ситници – излезете на вечера со саканите иако направивте пуканки за да гледате филм.

УЖИВАЈТЕ СЕГА
Научете се да ги впивате моментите, дури и оние навидум безначајни. Додека го шетате кучето, забележете ги боите на природата, ветерот што ви ја гали кожата. Ако ова ви делува смешно и како обврска, не очајувајте – кога на среќата гледаме како на цел за која е потребен труд и грижа, тоа значи дека ѝ даваме значење. За возврат, среќата навистина ќе го преплави нашиот живот.

СРЕЌА ВО ДОБРО ДРУШТВО

Ниту една од горенаведените практики за среќа не подразбира друштво, но секогаш кога е возможно, вклучете некого бидејќи ефектите ќе бидат поголеми. Социјалната конекција е клучна алка за среќа, бидејќи човекот има потреба од длабоки и значајни врски и односи. „За целосно подобрување на вашето постоење, неопходно е да се поврзувате со непознати“, така вели професорката по психологија Лаури Сантос. Волонтирајте во некоја организација за да сретнете нови лица или наместо со автомобил, повремено користете јавен превоз. Но, не заборавајте да разговарате со човекот до вас, а не да нурнете во телефонот.

The post Многу малку треба за среќа appeared first on Аптеки PlusPharma.