Семејство – Аптеки PlusPharma

Вашиот дом – Нов велнес центар

admin — Thu, 30 Apr 2020 06:51:25 +0000

Неколку совети за позитивни вибрации меѓу омилените ѕидови

Во карантин или не, домот е местото на кое со задоволство му се враќаме. Тоа е катче кое треба да нѐ ослободи од стресот што го акумулираме однадвор. Но, за да ви ги наполни батериите со позитивна енергија, погрижете се да не е токсичен.

Читањето го намалува нивото на стрес за неверојатни 68%

Загубете се меѓу зборови
Истражувањето на University of Sussex откри дека читањето го намалува нивото на стрес за неверојатни 68% – исто така го забавува срцевиот ритам, олабавувајќи ја тензијата во мускулите. Затоа, одберете агол од која било просторија во домот и претворете ја во катче за читање. Сместете фотелја, фрлете едно кебенце во неутрален тон, ставете ваза со сушена лаванда и наредете неколку книги на подот.

Самата реорганизација на книгите, понекогаш е доволна за да креирате атмосфера што повикува на читање.

Поканете ја природата во домот
Длабоката врска помеѓу луѓето и природата која е клучна за човековиот опстанок и благосостојба е и повеќе од легитимна. Затоа, актуелен е биофилија дизајнот или дизајн која ја имитира природата. Опкружување во кое се интегрирани екстериерот и ентериерот. Ваквиот дизајн особено се применува во канцелариите со цел да се зголеми продуктивноста и да се намали стресот меѓу вработените. Уште не ви е јасно! Канцеларија со вистинско дрво на средина или зелен ѕид креиран од вистински растенија. За почеток, претворете го балконот во мини џунгла.

Сте чуле ли за Воздушни цвеќиња? Потребен им е само воздух за да преживеат, а одлично ќе ги украсат челните ѕидови во дневната.

Технологијата зад врата
Психотерапевтот Nancy Colier во својата книга The Power Of Off, вели дека начинот на кој луѓето ја користат технологијата подразбира мозок оптоварен со безброј мисли, но минимум размислување. Во превод, рационалното и продуктивно размислување е сведено на минимум. Решението? Не толку „паметни домови“. Приклучете го телефонот да се полни во ходник и тетирајте го како да е фиксен; лаптопот сместете го на маса како да е десктоп компјутер. Идејата е да ја сместите технологијата на места кои ќе ве принудат свесно да одлучите дали ќе ја користите. Нејзината употреба нека ви стане избор, а не навика.

Прочистете го воздухот природно
Истражувањето на Imperial College London откри дека загадувањето на воздухот ги брише сите придобивки стекнати преку спортување, особено оние што се однесуваат на белите дробови и срцето. Не залажувајте се дека сте безбедни дома – хемикалиите, гасовите и бактериите се заглавуваат по ходниците, најмногу во зградите, а тоа значи дека воздухот може да биде 5 пати позагаден во споредба со оној надвор, тврди СЗО. И тука на сцена настапуваат цвеќињата кои го прочистуваат воздухот. Алое вера, продуцира кислород во текот на ноќта; Ѓаволскиот бршлен го отстранува формалдехидот и бензенот во воздухот.

27% се зголемиле пребарувањата, на Pinterest, за растенија кои го прочистуваат воздухот

The post Вашиот дом – Нов велнес центар appeared first on Аптеки PlusPharma.

Како да се одржи страста меѓу родителите

admin — Mon, 02 Sep 2019 09:18:30 +0000

Децата несомнено се плод на заедничка љубовна приказна меѓу двајцата родители, и секако една нова фаза во љубовниот соживот меѓу нив. Меѓутоа,новите членови во семејството носат и нови обврски и окупација, особено на мајката, па не ретко љубовта и страста позната претходно почува да се менува, а неретко и да исчезнува. И сето ова може да е во ред, барем на почетокот, додека родителите се запознаат подобро со новиот член и со новите улоги, дури и по цена да се жртвуваат дел од досегашните задоволства. Но, она што никако не смее да се жртвува е љубовта меѓу партнерите родители.

Многу често се случува заради оптовареност со обврски да не ви остане време за себе, а уште помалку за партнерот. Во секојдневната преокупација од обрски, се случува да заборавите дека пред да станете родители, сте биле љубовници, и тогаш основна цел ви била како да го направите партнерот среќен и задоволен, а со тоа и двајцата да бидете среќни.
Доколку заради премногу обврски кои ги носи родителството сте заборавиле на себе и партнерот, првиот чекор кон враќање во нормала е да ја прифатите реалната ситуација во која се наоѓате и да се потсетите каков ви бил заедничкиот живот пред да се приклучат децата. Емоциите сигурно се некаде длабоко во вас, едноставно треба да ги разбудите.
Како се однесувате кон партнерот и кои емоции ги покажувате, влијае и врз развојот на децата и како тие понатаму ќе ги искажуваат своите емоции кон своите животни партнери.

Отворена комуникација – клучен фактор

Многу е важно да комуницирате отворено, дури и за најмалите детали, затоа што ако нешто е неважно за вас, можеби е важно за партнерот и обратно. Општо е познато дека со зголемување на бројот на членови во семејството, се зголемува и бројот на обврски за партнерите. И кога обврските не се рамномерно поделени или се потценува нечија работа, тогаш се зголемува и бројот на кавги и конфликтни ситуации во домот. Во отворен разговор со партнерот, кога и двајцата сте релаксирани и без итни обврски што ви тежат над главата, пробајте да се договорите и да ги поделите соодветно обврските околу децата и домот. Подобро се работи на романтиката кога знаете дека ги имате поддршката и разбирањето од партнерот.

15-годишна студија направена во САД открива дека клучот за задоволство и среќа во бракот е заедничкото носење на одлуки. Кавги има во секое семејство, но дали бракот ќе се одржи или разниша зависи од способноста на партнерите за соработка и почит.

Сигурно секој од вас има по еден пар пријатели кои зборуваат само за децата на секоја дружба. Најверојатно и меѓусебно само за тоа разговараат. Што јаделе децата, што направиле во градинка или училиште, колку се добри во спорт итн… И сигурно не сакате да бидете еден од тие парови. Да комуницирате меѓусебно, значи да си одвоите по неколку минути во текот на денот да се прашате меѓусебно како сте, како го поминавте денот на работа, да се потсетите на омилената песна или филм и на тоа дека постои и живот надвор од тој што го диктира грижата за децата.
Пробајте барем еднаш месечно да организирате романтичен состанок само за вас двајца. За чување на децата договорете баба, дедо, тетка или изнајмете бебиситерка на неколку часа. А вие изберете ресторан, некој спа центар или, пак, мирна вечера дома. Во прилог на заедничката дружба е да имате и заедничко хоби.

Одвојте слободно време
Добра идеја е повремено да го разгалите партнерот, на што таа/тој треба да ви врати со иста мера. Дајте и/му слободен ден од родителските обврски, ден што ќе може да си го посвети само на себе, додека вие тој ден ќе ги завршите и нејзините/неговите обврски. Сигурно ќе ви биде малку тешко, ама нека ве води мислата дека и вашиот ден ќе дојде набрзо.
Покрај заедничкиот одмор со децата, добро е да имате барем еден викенд за себе, без деца. Изберете некоја блиска локација со набиен распоред за уживање, а децата оставете ги кај баба и дедо. Најверојатно ќе ве гризе совеста првите неколку часа или првиот ден, но дома ќе се вратите релаксирани со полни батерии за справување со родителските одговорности.

Делете комплименти

Ако порано комплиментите се однесувале повеќе на физичкиот изглед, сега потрудете се да не ги изоставите тие, но обрнете повеќе внимание на тоа како партнерот се справува со грижата за бебето, но внимава и на останатите членови на семејството. Пожелно е да го опсипувате партнерот со комплименти секојдневно.

Одржувајте здрав сексуален живот.

Да, постојано сте исцрпени, немате време, низ глава ви поминуваат разни ситуации на кои треба да одговорите, но сето тоа се само изговори за да избегнете да бидете интимни со партнерот. Ова најмногу се менува како приоритет кај жените. Точно, тешко е да се вратите на тоа веднаш по породувањето, кога и самите не можете да се препознаете ни физички ни психички, а врз тоа треба да се прифатите и во новата улога на мајка. Но, тоа не значи дека и после неколку месеци сèуште треба да го избегнувате партнерот. Сексот е и ваша биолошка потреба, а не само барање од партнерот. За многу жени, сексот е рефлексија на моменталната фаза во која се наоѓа врската меѓу партнерите. Ако се чувствуваат неразбрани или повредени, влијае на тоа како го доживуваат партнерот и како мислат дека партнерот ги доживува нив.

Вашата љубов и хармонија е важна за развојот на вашите деца

Децата веднаш насетуваат кога нешто не е во ред, како на пример доколку нивните родители не се среќни во бракот, иако пред нив никогаш не избувнале еден спрема друг или имале расправија. И за децата е добро да видат дека родителите се блиски и дека споделуваат нежности, како гушкање додека се гледа филм, некое попатно милување или бакнеж. Така и децата учат дека одредени емоции треба да се покажат во јавност, а од друга страна, тоа ќе ве опушти вас како родители и полесен ќе биде транзитот кон нешто поинтимно што треба да се одвива зад затворени врати. И бидете снаодливи, украдете по некоја минута во текот на денот, не мора тоа секогаш да биде доцна навечер откако ќе заспијат децата, кога и вие сте на половина пат до длабок сон.

Семејството е силно колку што е силен бракот, едното без другото не може да опстане. Гледајте на бракот и семејството како на тим, простувајте си, не бидете злопамтила и фокусирајте се на љубовта!

The post Како да се одржи страста меѓу родителите appeared first on Аптеки PlusPharma.

ДОБАР И ЛОШ ПОЛИЦАЕЦ

admin — Fri, 12 Jan 2018 13:36:45 +0000

Семејството е најзначајниот систем во кој припаѓаме. Неговата функционалност е од големо значење во процесот на воспитување и подигање на здраво потомство. Доколку овој систем не функционира добро, воспитувањето на децата може да се движи во правец кој е помалку посакуван.

„Какви родители – такви деца“ е одамна позната изрека која, секако, има свое значење. Каков е односот меѓу родителите, такви ќе бидат и децата – можеби е вистинско дополнение на оваа изрека.

Различни улоги

Добар и лош полицаец. Речиси секој родител се нашол во ваква улога кога станува збор за воспитување на децата. Често може да се слушне како еден од родителите ја има улогата на строг, додека другиот – на попустлив и мек. Кога мајката и таткото имаат различни улоги, децата знаат на кој родител за што треба да му се обратат. Во ваквата поделба нема ништо лошо освен погрешнотo етикетирање на родителите како добар или како лош. Доколку само едниот родител поставува барања кон детето, а другиот е целосно одземен од таквата улога, односот и поврзаноста во релацијата родител-дете би можел да се наруши. Доколку мама и тато не се сложни во начинот на воспитување, тогаш детето не се учи што е добро, а што лошо или што е дозволено, а што е недозволено однесување. На овој начин, децата се збунети и несигурни. Доколку едниот родител охрабрува и поддржува одредено однесување кај детето, а другиот родител е против тоа и го осудува, детето нема да биде сигурно во себе и во своите постапки, ниту пак во своите родители и во нивните реакции.

Двонасочен однос

Добар дел од карактеристиките на личноста децата ги наследуваат од своите родители, но добар дел од градењето на својот личен карактер и однесување ќе бидат преземени и усвоени од моделот и од климата која владее меѓу родителите и родителско-партнерскиот однос. Важно е да се знае дека и детето со својата индивидуалност, со склопот на личноста кој е карактеристичен само за него, влијае на тоа како родителите ќе го воспитуваат. Паметен и посветен родител со сигурност ќе почувствува и ќе знае на каква мерка неговото дете најдобро ќе реагира. Некое дете подобро ќе реагира на казна, друго, пак, ќе биде попродуктивно доколку почесто го пофалувате. Бидете паметен родител бидејќи здравата средина, мирот во куќата и здравиот психолошки развој на детето се најважни за секој родител.

Родителскиот сојуз и неговата функционалност се многу важни алки во системот наречен „семејство“. За да биде успешен овој сојуз, мора да го сочинуваат сложни членови, со иста мисија и со усогласени чекори и стратегија.

Неколку совети:

Никогаш не покажувајте различни воспитни ставови пред детето. Ставовите и за тоа кој е најдобар, утврдете ги во негово отсуство.
Бидете рамноправни. Поделете ги задолженијата за да ви биде полесно.
Бидете отворени во комуникацијата со детето. Создадете услови за детето да ви се доверува и на двајцата.
Носете ги заедно одлуките за важни прашања.
Поддржувајте се еден со друг во присуство на детето. На овој начин дејствувате одлучно и давате добар пример како мама и тато треба да се однесуваат.
Не запоставувајте го брачниот однос. Задоволството од брачниот однос во голема мера влијае на успешноста и во другите семејни релации.
Обидете се да се синхронизирате на ниво на сојуз, барања, пофалби и критики упатени кон однесувањето на детето.

The post ДОБАР И ЛОШ ПОЛИЦАЕЦ appeared first on Аптеки PlusPharma.

РОДИТЕЛСТВО – најголема привилегија

admin — Tue, 09 Jan 2018 11:30:49 +0000

Животот ни е преполн со цели, некои достижни и полесни, некои дури и недостижни и претешки. Колку е потешка целта, толку е потежок и патот, но на крајот и задоволството е поголемо. Велат дека родителството е најголемата привилегија на човекот, но во склад со логиката и една од најтешките. Тоа е како одење по жица. Еден погрешен чекор и штетата е голема.

Како да се биде добар родител и како да изградиме здраво и воспитано дете е прашање на секој родител. Постојат многу фактори и услови за добар одговор, но можеби вистината се крие во предусловот дека за добро воспитано дете е неопходен добро воспитан родител. Никогаш не е предоцна за ништо. Животот нè учи дека ништо не е невозможно и недостижно, но промените, сепак, започнете ги од себе.

Првата врата ја отвораме ние

Однесувањето на децата е директно зависно од нашето однесување кон нив, кон останатите членови од семејството и кон околината. Нашите грешки во иднина ќе бидат и нивни грешки.

Како да се справиме и како да бидеме добар пример за добро однесување?

КОГА ВИКАМЕ – Викањето на децата не е од никаква корист, ниту за вас ниту за децата. Но сепак, ова е честа метода која ја применуваме кога „не ни е денот“. Децата, исто така, можат да влезат во „лоша фаза” особено во вакви зимски денови затворени дома, па својата енергија и креативност ја манифестираат на свој единствен начин со правење доста врева и неред низ домот. Но наместо да им пријдеме со љубов и внимание, децата добиваат едно хистерично „СМИРЕТЕ СЕ!“ Користа од ова е скоро никаква. Oсвен што подоцна можеби ќе имате грижа на совест, а децата само ќе го следат вашиот пример, па ќе прераснат во вистински галамџии. Најпрво проверете дали можеби детето е гладно, ненаспано, дали треба да се пресоблече или, пак, едноставно им е досадно и се желни за игра и за внимание.
Корисни тактики во вакви ситуации

Кога ќе започне детската бура, пристапете со гушкање, скокоткање или промена на локацијата (на децата брзо им станува здодевно на една локација и најчесто сакаат надвор). Промената на активности е докажано ефикасна (ако им е здодеано од нивната игра понудете им да ви помогнат во некоја ваша активност). На овој начин низ игра ќе успеете да завршите и некои од обврските во домот (чистење, подготовка на ручек и сл.)

КОГА КОРИСТИМЕ НЕСООДВЕТЕН И ВУЛГАРЕН РЕЧНИК – Сигурно безброј пати си имате ветено дека ќе се однесувате примерно и дека нема да користите вулгарности и псовки не само пред вашето дете, туку генерално. И така е сè до следното „вадење од такт“. Во таквиот афект, недоличните зборови и псовки сочно се вклопуваат во вашиот речник, а вашите деца сето тоа многу прецизно го меморираат и понатаму го користат во нивниот речник. Децата не знаат течно да го изговорат своето име, но затоа, по некое чудо, псовките и недоличните зборови ги говорат без тешкотија.

ФРЛАЊЕ ОТПАД – Мислејќи дека никој не нè набљудува, често се случува ситен отпад, гуми за џвакање, цигари и сл. да ги фрламе без пардон на јавни места, во паркови, со изговор дека нема соодветна корпа за отпад. Интересен и најчест е примерот со ослободување од отпад кога сме во автомобил. Ако ние ова го правиме пред очите на нашите деца, штетата е повеќе од дуплирана. Што по околината, што по однесувањето и прифаќањето на навиката и кај детето. Спротивно на ова, бидете грижливи кон околината и бидете пример за еколошка свесност. Придржете го ситниот отпад во вашите раце, џебови или чанти. Направете натпревар кој побрзо ќе стигне или ќе пронајде корпа во која ќе се ослободите од отпадот!

НА ЗАЕДНИЧКА ТРПЕЗА – Факт е дека сè поретко седнуваме на заеднички ручек или вечера, но и кога ќе се собереме сите заедно (вообичаено за викенд) речиси задолжително тука е неизбежниот ТВ-приемник вклучен во заднина. Ова, на некој начин, е сосема нормална појава. Но замислете деловен ручек со истиот ТВ-приемник во кој вие „ѕиркате”. Сигурно нема да си дозволите таков луксуз. Заедничкиот оброк е убав момент и можност да се посвети внимание на децата, а и да им се покаже почитување.

Ретко кој го исклучува или не реагира на првото ѕвонење на мобилниот телефон за време на ручекот. Веднаш скокнуваме за да одговориме на повикот. Утре, кога вашите мали ќе станат тинејџери и кога ќе го направат истото тоа, ќе следи познатата реакција: „прво заврши со јадењето, никаде не гори!“ Токму така, времето на заедничка трпеза е еден убав ритуал кој вашите деца треба да го понесат во иднина во нивните домови. Затоа, исклучете ги телефоните и ТВ-приемникот. Пуштете релаксирачка музика и уживајте. Не заборавајте на магичниот збор „пријатно јадење“ и останете на масата сè додека сите не завршат со јадењето.

КОРИСТЕТЕ МАГИЧНИ ЗБОРОВИ – Заблагодарете му се на вашето дете секогаш кога ќе ви помогне во нешто. Дајте му нешто и кажете му „повели“. Направете нешто погрешно и извинете му се. Избегнувајте да давате само наредби: „дај ми ова, дај ми она“, без да замолите. Подоцна ќе се изненадите и ќе се чувствувате непријатно кога детето ќе ви одговори со ист тон или на ист начин и ќе се чувствувате засрамено ако тоа го прави на некој друг.

Не прекинувајте ги децата додека се обидуваат да ви кажат нешто. Имајте трпение да ги слушате дури и баналните работи.

Константното детско потпрашување може да биде заморно, но убаво е кога децата се љубопитни и кога сакаат нешто да научат. Повеќе ќе ви е драго тоа отколку да се незаитересирани за светот околу нив.

Грешките кои секојдневно ги правиме стануваат видливи во воспитувањето и однесувањето на нашите деца. Колку порано почнеме да ги исправуваме кај себе, толку повеќе ќе се поштедиме самите себеси од понатамошни главоболки предизвикани од лошото или неправилно воспитување.

Совет:

Никогаш не обвинувајте ги децата за направените грешки, вината е наша зашто не сме се обиделе или не сме знаеле да ги научиме подобро.

The post РОДИТЕЛСТВО – најголема привилегија appeared first on Аптеки PlusPharma.