Слични, но не и исти – откријте ја вистинската формула за вашата кожа

Ретинол или ретинал – иако се разликуваат само по една буква, станува збор за комплетно различни, но подеднакво ефикасни состојки за кожа. Поради својот уникатен молекуларен состав, ретинолот и ретиналот различно реагираат на кожата.

Кој да го одберете?

Одлуката најлесно ќе ја донесете откако ќе ги проучите нивните разлики. Затоа, фаќајте прибелешки, бидејќи оваа статија ќе ви донесе јасна слика што точно можат да ви понудат овие моќни состојки за нега на кожа.

Која е разликата меѓу ретинол и ретинал?

И ретинолот и ретиналот се форми на витамин А, кој пак се користи за намалување на фините линии, брчките и за третман на акни. Разликата меѓу ретинолот и ретиналот се сведува на тоа како кожата ги претвора овие две во ретиноична киселина – активната форма што ја користат клетките на кожата.

• Ретинол: ретинол – ретинал – ретиноична киселина (две фази на претворање)
• Ретинал: ретинал – ретиноична киселина (една фаза на претворање)

Ова е суштинска разлика, бидејќи ретиналот е помалку разреден и поефикасен од ретинолот. Со други зборови, ретиналот овозможува побрзи резултати, додека ретинолот делува побавно и поблаго.

Јачина и ефикасност

Најчесто поставувано прашање: Дали ретиналот е посилен од ретинолот? Одговорот е: ДА! Бидејќи ретиналот е само на еден чекор од ретиноична киселина, неговото дејство е побрзо и поефикасно.

Ретиналот е одличен избор за оние што сакаат побрзи резултати при третирање на акните или знаците на стареење. Но, токму поради својата моќност, ретиналот може да предизвика иритација, особено кај чувствителната кожа.

Затоа, изборот меѓу ретинал и ретинол треба да зависи од вашата толеранција и искуство со агресивни активни состојки од овој тип.

Текстура и формулација

Разликата меѓу ретиналот и ретинолот се забележува и во текстурата на производите. Ретиналот е многу нестабилен и поради тоа е тешко да се спакува во готов производ за употреба. Најчесто се наоѓа во премиум производи, обично спакувани во безвоздушни амбалажи за да се зачува неговата ефикасност.
Ретинолот е постабилен и подостапен, што го прави најдобар избор за почетници. Поквалитетните серуми на база на ретинол често користат капсулиран ретинол за поблагo и постепено ослободување.

Бенефити: што може да очекувате?

И покрај разликите, ретинолот и ретиналот нудат импресивни придобивки:

• Ги намалуваат фините линии, со тоа што ретиналот дава побрзи резултати.
• Ја ублажуваат хиперпигментацијата.
• Ја зголемуваат продукцијата на колаген.
• Ги третираат акните, со тоа што ретиналот има посилно антибактериско дејство.

Затоа, изборот не е „кое е подобро“, туку „кое е подобро за вас“?

Толеранција на кожата: ретинал vs. ретинол

Кај чувствителна кожа, ретинолот е генерално поподнослив поради побавното апсорбирање и понежното дејство. Ретиналот, иако е многу ефикасен, може побрзо да предизвика лупење или сувост, особено ако се користи без постепено навикнување.

За да го избегнете тоа, почнете со ретинол двапати неделно и набљудувајте ја реакцијата на кожата пред да почнете почесто да го нанесувате.
Дерматолозите препорачуваат постепено да се премине од 2–3 пати неделно кон секојдневна употреба.

Што да изберете?

• Изберете ретинол ако сте почетник или ако имате чувствителна кожа.
• Изберете ретинал ако сакате побрзи резултати и ако вашата кожа поднесува посилни активни состојки, или ако сте имале позитивно искуство со употреба на ретинол.

Разликата меѓу ретинолот и ретиналот не е само теоретска – таа е важна за здравјето и за изгледот на вашата кожа на долг рок.

Сѐ е во персонализацијата

Што е разликата меѓу ретинолот и ретиналот? Најкусо кажано: јачина, ефикасност и брзина на конверзија.
И двете состојки се научно потврдени и многу ефикасни, но најдобриот избор зависи од вашиот тип на кожа, целите и преференциите. Ако штотуку започнувате со ретиноиди, ретинолот е најдобар избор. Ако барате клинички докажани резултати со помалку чекори, ретиналот може да биде вашиот нов најдобар сојузник.
Конзистентноста е клучна. Ретиноидите не делуваат преку ноќ, но со вистинскиот избор ќе се разбудите со помазна, почиста и посјајна кожа.

Предупредување

Не користете ги заедно! Како што прочитавте, и двете состојки се претвораат во ист активен облик (ретиноична киселина), па комбинацијата само ќе го зголеми ризикот од иритација без да донесе дополнителни бенефити за кожата.