Ако во ноември и декември барате место кое наликува на илустрација од божиќна разгледница, тогаш Колмар е дестинацијата што ќе ве освои. Овој мал град во францускиот регион Елзас, е вистинско откритие за сите што сакаат да избегнат гужви во метрополите, но сепак да уживаат во автентична празнична атмосфера. Со шарените куќички со дрвени фасади, уличките од калдрма и романтичните канали, Колмар е магично зимско катче што вреди да се доживее.

Град на пет божиќни базари

Она што го прави Колмар посебен е фактот дека во декември низ градот има дури 5 различни божиќни базари, секој со своја приказна и атмосфера:

• Place des Dominicains – со рачно изработени украси и уникатни подароци.
• Place Jeanne d’Arc – каде што ќе ги најдете традиционалните производи од Елзас: сирења, колбаси, мед и вино.
• Place de l’Ancienne Douane – најпознатиот базар, сместен покрај каналите, каде што мириса на цимет и топло вино.
• Малиот базар кај Детскиот музеј на играчки – совршен за семејства со деца.
• Artisanat d’Art – базар посветен на уметноста и ракотворбите, каде што може да се видат мајстори на дело.

Прошетката низ базарите е вистинско патување низ вкусови и мириси: печени костени, ситни колачиња со бадеми и цимет, греано вино од Елзас кое ќе ве стопли во студените вечери.

Што да се види и доживее?

Покрај базарите, Колмар има и бројни знаменитости кои во зима добиваат уште посебен шарм:

• Мала Венеција (La Petite Venise) – кварт со шарени куќички и канали, совршен за фотографии.
• Музејот Унтерлинден – каде што се чува познатата уметничка ризница Изенхајмскиот олтар, ремек-дело на германскиот уметник Матијас Гриневалд.
• Црквата „Свети Мартин“ – готска катедрала со впечатлива архитектура.
• Божиќното осветлување низ градот – секоја вечер Колмар блеска со стотици светилки и декорации кои создаваат магична атмосфера.

Клима и атмосфера

Во овој период, температурите во Колмар се движат меѓу 0° и 7°C, што значи дека треба да понесете топла јакна, шал и ракавици. Снегот не е секогаш загарантиран, но свежиот зимски воздух и празничната декорација ќе направат да се чувствувате како во зимска бајка.

Како да стигнете од Скопје до Колмар?

Најпрактично е да се патува со авион од Скопје до Базел (Швајцарија). Од Базел до Колмар има околу 70 километри и се стигнува за еден час патување со воз или со автомобил. Друга опција е лет до Стразбур, па потоа возење од околу 45 минути.