Kомарците се натрапници што на некој начин ни го „загорчуваат“ уживањето во топлите летни ноќи. Овие двокрилни, долгоноги инсекти, освен што се познати како напасници кои го нарушуваат нашиот мир особено во летниот период, имаат и сѐ поголемо влијание врз здравјето. Имено, комарците влегуваат во најважната група на инсекти-преносители на фактори за различни заразни заболувања.

Распространетост и медицинско значење
Во светот има повеќе од три илјади видови комарци, но од медицински аспект важни се само неколку од нив, затоа што мнозинството од нив и не ги касаат луѓето. Од позначајните заболувања кои се пренесуваат и се шират со каснувањето од комарците се: маларијата, жолтата треска и разни видови енцефалитис.
Во Македонија егзистираат околу 140 видови комарци кои, за среќа, освен предизвикување на локални алергиски реакции и нарушување на мирот при извршување на секојдневните активности и при престојoт во природа, не се преносители на сериозни заболувања. Но, поради евидентните климатски промени и отворениот пазар за транспорт на производи и стоки кои може да бидат погоден медуим за развој на комарци, не е исклучена и можноста од појава на нови видови, како што е сѐ почесто спомнуваниот тигрест комарец (преносител на вирусот денга).

Кога и кој е следната „жртва“?

Комарците главно се активни во летниот период, но во зависност од временските околности, својата активност можат да ја започнат и во рана пролет, па сѐ до доцна есен. Вечерните и раните утрински часови се резервирани за напасничкиот поход кога комарците се најактивни во потрагата по „свежа крв“.

Иако комарците „напаѓаат“ едни луѓе повеќе од други, тоа нема никаква врска со количината на шеќер во крвта, цветните мириси или некои други елементи. Сите комарци се привлекуваат од јаглероден диоксид, млечна киселина и од одредени видови бактерии кои кај некои луѓе се застапени во поголема концентрација.

 
Зошто комарците цицаат крв?

Протеините од крвта се неопходни за развој и подигање нови генерации на комарци. 

Како да се спасиме од непријатните каснувања?

• Заштита на просториите во кои престојуваме со мрежи и со завеси.
• При престој во паркови, ливади и друг отворен простор се препорачува носење лесна облека со долги ракави, по можност со светла или бела боја.
• Употреба на хемиски средства коишто ги одбиват комарците – рапиленти (само доколку е неопходно) и тоа во согласност со упатствата за употреба.
• Употреба на природни производи, во прв ред етерични масла и екстракти од растенија, како паметна алтернатива за добра и безбедна заштита од комарци.