Во време кога буквално „спиеме на нозе“, сèпочести се деновите кога заморот и општата слабост преовладуваат во нашите животи. Сепак, со добар сон и со соодветен одмор веќе следниот ден сме полни со енергија за новите предизвици. Ваквиот замор е сосема нормален и е од минлив карактер. Сепак, она што загрижува е сликата во која заморот преминува во хроничен и секојдневен.
Тоа е речиси трајна состојба на замор која се развива со текот на времето и во форма на паразит ја намалува вашата енергија и менталната способност.

Што е хроничен замор и како да се разликува од обичен замор или поспаност?

Хроничниот замор претставува недостаток на енергија, не само кога сме активни, туку и во состојба на седење и мирување. Тоа е состојба со која ни започнува и ни завршува денот.

Хроничниот замор, воедно, е и хроничен стрес за организмот.

Хроничниот замор влијае врз социјалниот живот и врз работоспособноста на единката. При ваквата состојба, дури и помал физички или ментален напор влијаат на губењето на енергијата.

Симптоми:

• недостаток на енергија и чувство на екстремна исцрпеност која трае во континуитет
• намалена меморија или концентрација
• болки во грбот и во мускулите
• јаки специфични главоболки
• нарушувања на сонот

Дополнителни симптоми поврзани со хроничниот замор:

• нарушена циркулација во екстремитетите (ладни нозе)
• суви очи и уста
• проблеми со видот
• зачестени инфекции на дишните и на мочните патишта

Симптомите се разликуваат од личност до личност, но и кај еден ист човек може да се сменат во период од неколку месеци. Вообичаено, симптомите се појавуваат одеднаш, но кај некои луѓе може да се појават постепено, во период од неколку недели, па и месеци.

Кои се причините?

Се смета дека хроничниот замор е резултат на комбинација на фактори, како што се: лоши животни навики, психолошки фактори и одредени здравствени состојби.

Животни навики кои се поврзани со појава на хроничен замор:

• употреба на алкохол и опојни дроги
• зголемено внесување кофеин
• претерана физичка активност
• неактивност
• неквалитетен сон или недостаток на сон
• употреба на одредени лекови (антихистаминици, седативи, антидепресиви, лекови за крвен притисок)
• лоши прехранбени навики (консумирање тешка, масна и индустриски обработена храна)

Психолошки проблеми:

Заморот е чест симптом и на одредени ментални здравствени проблеми како што се:

• депресија
• стрес
• тага

 Медицински состојби и заболувања:

• анемија
• срцеви заболувања
• хипер и хипотиреоза
• прекумерна телесна тежина
• бременост
• ноќна апнеја (краткотрајни прекинувања или паузи на дишењето во тек на спиење)
• дијабетес тип 1 и 2

Дали возраста и полот може да бидат предиспонирачки фактори?

Хроничен замор може да се појави на која било возраст, но најчесто ги „напаѓа“ луѓето во нивните 40-ти и 50-ти години, без разлика на социоекономската припадност или раса. Никој не е исклучен од ризикот за појава, па дури ни децата, кај кои најчесто се појавува во тинејџерските години.

Како да си помогнете сами?

1. Започете со сонот.
Обидете се да издвоите доволно време за добар сон. Најмалку 6-8 часа дневно. Скратувањето на сонот од час или два може негативно да се одрази на нивото на енергија, концентрација и меморија, особено доколку ова кратење се повторува од ден на ден.

2. Коригирајте  ја исхраната
Внесувајте повеќе храна богата со витамини од групата Б, затоа што овие витамини поволно делуваат на нервниот и на мускулниот систем, и ја стимулираат работата на имунолошкиот систем. Најмногу ги има во пивскиот квасец, потоа во јаткастото овошје, бобинките, мешунките и во печурките.
Истражувањата покажуваат дека внесувањето калиум и магнезиум може да ги олесни симптомите поврзани со  хроничниот замор. Затоа, збогатете ја вашата исхрана со спанаќ, семки од тиква, јогурт, кефир, смокви, авокадо, црно чоколадо и банани.

3. Имајте баланс во сè
Адаптирајте го својот живот во согласност со можностите. Имајте свое темпо што нема да ги надминува вашите капацитети. Напорот може да ја влоши состојбата, но тоа не значи дека треба да останете неактивни. Исто како што зголемениот напор може да има негативни ефекти, така и неработењето, досадувањето и мирувањето може да предизвикаат психички замор.

4. Вежбајте умерено
Практикувајте вежби за растегнување и лесни телесни вежби или, пак, јога вежби. Со време ќе бидете во можност да го зголемите интензитетот и времетраењето на вежбите, и да вклучите аеробни вежби (пешачење, возење велосипед и вежби во вода). Така, постепено ќе го зголемувате нивото на енергија во организмот, без да се чувствувате истоштено по вежбањето.
Најважно е вежбите што ги сакате да ги правите секојдневно, со темпо соодветно на вашите можности и реални цели.

5. Релаксирачки масажи и ароматерапија
И за крај, релаксирајте се. Одберете еден ден во неделата што ќе го посветите на одмор, без ниту една обврска.  Дозволете си релаксирачка масажа со етерични масла кои имаат благотворно дејство на организмот. Опуштете се во топла бања во која ќе додадете неколку капки масло од лаванда или сандалово дрво.
.