Кај нас, салатата најчесто се служи како предјадење или, пак, како прилог со главното јадење. Сепак, гледано нутриционистички, добро комбинираните салати може да бидат и комплетен оброк што ќе го задоволи организмот со сите неопходни хранливи компоненти. Згора на тоа, се работи за оброк што е лесен, брзо се вари и лесно се подготвува.
Промената на традиционалниот концепт на исхрана и воведувањето на салатата како главно јадење, со себе ќе донесе и низа здравствени придобивки.Пробајте некои од нашите препораки или, пак, едноставно искористете намирници што ви се при рака и направете комбинација по ваш избор. Добар апетит!

Чинија како сликарско платно

Потребни состојки:

• 500 г шитаке печурки

• 5 црвени везени пиперки (може и луто по вкус)

• 3-4 чешниња лук

• 1 китка магдонос, маслиново масло, јаболков оцет, сол и бибер во зрно

Подготовка:

Печурките се бланшираат околу 2 минути во врела вода, во која е додадено малку оцет. Се ладат под млаз вода и се сечат на парчиња. Се додаваат везените пиперки, исто така исечкани, во форма по желба. Се сечкаат лукчето и магдоносот и сè заедно се меша со додавање сол, бибер, масло и оцет. Пред да се консумира, би било добро салатата да отстои петнаесетина минути.

Совет плус: наместо шитаке, можете да употребите друг вид расположлива печурка (лисичарка, вргањ, буковка).

Брокола со сирење и јајце

• 1 кг брокола

• 200 г бело сирење

• 4 лажици павлака

• 2 јајца

• 3 лажици маслиново масло

• 2 лажици лимонов сок

• 2 чешниња бел лук

• сол, бибер

Броколата одвојте ја на цветчиња и обарете ја во вода (не повеќе од 4 минути) во која претходно сте додале малку сол, масло и лажица лимонов сок. Процедете и оставете да се излади. Во меѓувреме, сирењето измешајте го со павлаката и со истолчениот лук. Прелијте со лажица лимонов сок, посолете и забиберете. Со вака подготвениот сос, прелијте ја броколата, промешајте и од горе додадете ги варените јајца исечкани на осминки.

Салата од грашок

• 500 г варен грашок

• 2 варени јајца

• бело месо

• 1 кисела павлака

• 2 кисели краставички

• 1 лажичка сенф

• сол, бибер, сечкан магдонос

Грашокот се бари и се лади. Белото месо се вари и се сечка на ситно. Се сечкаат јајцата и краставичките, и сè заедно се меша со сите останати состојки. Се лади и се сервира.

Мексичка салата

• 250 г црвен грав

• 250 г пченка шеќерац

• 1 праз

• 1 помала главица кромид

• 2 чешниња бел лук

• 2 печени пиперки

• 1 краставица

• месо по желба (димена пастрмка, туна, бело пилешко месо)

• маслиново масло, сол, бибер, магдонос, сок од лимон

Сите состојки се сечкаат и се мешаат заедно со гравот и пченката. Се додава малку маслиново масло, се меша, се зачинува и се посолува. На крај, се додава месото. Се остава да се излади и се сервира.

Кус кус салата

Карфиол салата

• главица карфиол

• 2 моркова

• 2 пиперки

• 4 чешниња лук

• 1 главица кромид

• 4 лажици лимонов сок

• 8 лажици маслиново масло

• 1 лажичка сусам

• ким, малку шеќер, сол и бибер

Одвојте цветчиња карфиол, обарете ги во посолена вода, додадете го морковот сечкан на крукчиња и варете уште десетина минути. Ситно исечкајте ги лукот и кромидот и измешајте ги со сокот од лимон, ким, бибер, малку шеќер и со маслиновото масло. Карфиолот и морковот процедете ги и кратко ставете под млаз ладна вода и, додека е млако, прелијте со подготвениот прелив. Кон смесата додадете ја исечканата пиперка и промешајте. Доколку сте љубител на луто, додадете толчена пиперка или лут црвен пипер.