Pasion interesant me përfitime për të gjithë familjen

Imagjinoni të keni mundësi të këpusni dy ose tri gjethe borziloku të freskët, rozmarinë, nenexhik ose çfarëdo bime tjetër për të aromatizuar ushqimet tuaja derisa gatuani. A do të ishin ato më të shijshme? Sigurisht që po! A do të ishin më të shëndetshme? Pa dyshim! Të e mos e përmendim hijeshinë që do të marrë kuzhina me të gjitha ato bimë të freskëta përreth.

Aroma intensive që ndihet me çdo tundje të gjetheve delikate të bimëve i mbush shqisat duke dhënë një qetësi të pazakontë, apo jo? Ndoshta kjo ide ju tingëllon si një skenar i shkëlqyer për një emision gatimi, por ju sigurojmë se me pak përpjekje, mund ta realizoni.

Përdorni çdo vazo ose saksi që keni në dispozicion, e nëse keni më shumë hapësirë ​​në ballkon ose keni oborr, përfshini edhe një shtrat kopshti. Shtrati i kopshtit, që i ngjan një arke druri, është projektuar për rritjen e bimëve në një hapësirë ​​të vogël. Përveç bimëve, mund ta përdorni për të rritur perime dhe fruta të imëta si spec djegës, domate qershi, luleshtrydhe, manaferra etj.

Drita është më e rëndësishmja

Gjëja e parë që duhet të merrni parasysh kur rrisni bimë në vazo ose shtrat kopshti është vendndodhja. Zgjidhni një vend që është i ekspozuar më së paku gjashtë orë në ditë ndaj rrezeve të diellit, pasi shumica e bimëve kanë nevojë për diell të vazhdueshëm që të lulëzojnë. Nëse nuk keni një hapësirë të tillë, rritni bimë që tolerojnë pjesërisht hije si nenexhik, majdanoz dhe koriandër.

Cilat bimë kanë më shumë sukses?

Zgjedhja e bimëve që do të arrijnë të lulëzojnë në një hapësirë ​​të vogël është e kufizuar, por mos u zhgënjeni që në dështimin e parë. Bimët më të kërkuara si borziloku, trumza, rigoni, rozmarina, qepujkat, janë më të lehta për t’u rritur sepse kërkojnë përkujdesje minimale. Detyrimisht përpiquni të rritni ato bimë të cilat nuk duhet t’i anashkaloni në asnjë vakt tuajin, si majdanoz, koriandër, kopër dhe lloje të ndryshme nenexhiku.

Tokë cilësore nënkupton edhe bimë cilësore

Sa herë që mbillni bimë, sigurohuni që të përdorni një përzierje të gatshme për saksi, me cilësi të lartë. Në këtë mënyrë do t’i furnizoni bimët me të gjitha lëndët ushqyese që u nevojiten dhe do t’u siguroni atyre kullim për një rritje më të mirë. Bëni kujdes me rradhitjen e farave duke marrë parasysh hapësirën e nevojshme, sepse nëse rrënjët janë të ngarkuara dhe të grumbulluara shumë pranë njëra-tjetrës, bimët nuk do të përparojnë.

Mbani ato të ujitura

Bimët kërkojnë ujitje të rregullt, veçanërisht gjatë periudhës së verës. Megjithatë, kini kujdes që të mos i ujisni tepër dhe të nxisni kalbjen e rrënjëve. Pasi shtresa e sipërme e tokës të jetë tharë, është koha për të ujitur bimët. Do t’ia lehtësoni vetes nëse mbillni bimë që kanë nevoja të ngjashme, përndryshe do t’ju duhet më shumë përpjekje për t’i kontrolluar ato.

Plehërimi

Bimët përfitojnë nga plehërimi i rregullt pasi kjo gjë i ndihmon ato të rriten të forta dhe të shëndetshme. Për t’ua mundësuar këtë, është e nevojshme që t’i plehëroni.

Mund të shfrytëzoni një pleh të balancuar, të tretshëm në ujë ose një pleh organik me çlirim të ngadalshëm për t’u siguruar bimëve materiet ushqyese që u nevojiten. Ju gjithashtu mund të përdorni një përzierje ose pleh të vjetër si një alternativë organike.

Mbroni ato nga insektet

Kontrolli i dëmtuesve dhe sëmundjeve është një aspekt shumë i rëndësishëm i rritjes së bimëve. Duke kontrolluar rregullisht bimët tuaja për ndonjë shenjë të dëmtuesve ose sëmundjeve, siç është zverdhja e gjetheve ose vyshkja, do të arrini ta parandaloni problemin përpara se të bëhet serioz.

Nëse i korrni rregullisht barishtet, do të nxisni rritje të re dhe do të parandaloni tejmbushjen e mundshme në saksi. Për ta bërë këtë me sukses, thjesht prisni gjethet ose kërcejtë me gërshërë ose një thikë të mprehtë. Gjithashtu mund të këpusni majat e bimës për të nxitur rritjen e tyre.