Çfarë është më e shëndetshme për të filluar ditën?
Me zgjedhjen e duhur të lëndëve ushqyese në mëngjes, do të keni pothuajse gjithmonë një ditë produktive dhe me shumë energji. Por, cila është zgjedhja e duhur? Ushqimi i ëmbël në mëngjes zakonisht i acaron shqisat, megjithatë ekzistojnë argumente bindëse se është shumë më e shëndetshme të hani një mëngjes të kripur. Në epokën e budingut chia dhe drithërave me qumësht dhe mjaltë, kjo mund të tingëllojë e çuditshme, por përfitimet e një mëngjesi të kripur ia vlen të hulumtohen.
Më shumë energji
Vakti i kripur siguron një çlirim të qëndrueshëm dhe gradual të energjisë gjatë gjithë mëngjesit. Për dallim nga mëngjesi i ëmbël i cili mund të shkaktojë një rritje të menjëhershme të sheqerit në gjak, shoqëruar nga një rënie e papritur, ushqimet e kripura kanë një profil më të ekuilibruar të makronutrientëve që ruajnë nivele të qëndrueshme të sheqerit. Kjo ndihmon në ruajtjen e niveleve të energjisë gjatë gjithë ditës dhe zgjat gjithashtu edhe ndjenjën e ngopjes. Mëngjesi i kripur i shëndetshëm, si bukë e thekur me avokado, i spërkatur me kripë deti ose një omëletë e pasur me proteina, do të shuajë plotësisht urinë tuaj dhe do t’ju ndihmojë të përqendroheni.
Funksion më i mirë njohës
Hulumtimet tregojnë se natriumi, kur konsumohet në sasi të duhura, mund të përmirësojë funksionin njohës. Natriumi ndihmon në ruajtjen e aktivitetit elektrik të trurit, i cili është thelbësor për proceset njohëse. Vakti i kripur në mëngjes mund të sigurojë lëndët ushqyese të nevojshme për ruajtjen e shëndetit të trurit, përmirësimin e përqendrimit dhe qartësisë mendore. Kjo mund të jetë veçanërisht e dobishme për studentët, punonjësit dhe këdo që duhet të jetë i zgjuar mendërisht gjatë ditës.
Hidratim më i mirë
Edhe pse duket kontradiktore, vakti i kripur në fakt mund të ndihmojë në ruajtjen e hidratimit të duhur. Natriumi ndihmon në rregullimin e ekuilibrit të lëngjeve të trupit, duke siguruar që qelizat të hidratohen në mënyrën e duhur. Kjo është veçanërisht e rëndësishme pas gjumit të natës, pasi trupi zakonisht dehidratohet gjatë pushimit. Fillimi i ditës me një mëngjes të shijshëm të kripur, mund të ndihmojë në rimbushjen e elektroliteve të humbura dhe të ruajë hidratimin e përgjithshëm.
Reduktim i nevojës për ëmbëlsirë
Fillimi i ditës me një vakt të shijshëm mund të ndihmojë në uljen e dëshirës për ushqime të ëmbla më vonë gjatë ditës. Ushqimi i kripur mund të sigurojë ndjenjën e ngopjes dhe kënaqësisë, duke zvogëluar gjasat për të kërkuar ushqime jo të shëndetshme. Kjo mund të kontribuojë në zgjedhje më të mira ushqimore dhe të mbështesë regjimin për humbje peshe.
-Shkenca për kripën-
Kripa, ose kloruri i natriumit, është një mineral thelbësor për të cilin trupi ka nevojë që të funksionojë. Natriumi luan një rol themelor në ruajtjen e ekuilibrit të lëngjeve, transmetimin nervor dhe funksionin e muskujve. Ndërsa marrja e tepërt e kripës është e lidhur me probleme shëndetësore si hipertensioni, një sasi e ekuilibruar është jetike për mirëqenien e përgjithshme.
Ide të lehta dhe të shijshme për mëngjes të kripur
- Bukë e thekur me avokado: Përhapni avokadon e shtypur në një fetë buke të thekur, spërkatni me kripë deti dhe pikoni sipër disa pika limoni.
- Kos grek me fruta të thata arrore dhe fara: Kosit grek shtoni një përzierje frutash të thata arrore, fara dhe pak kripë për një mëngjes të pasur me proteina.
- Fjolla tërshëre të kripura: Zbutni fjollat e tërshërës në kos dhe sipër spërkatni pak kripë deti të trashë.
- Simite me vezë: Bëni simite me miell tërshëre, vezë, brokoli, kungulleshka dhe gjizë për një vakt të plotë me proteina dhe karbohidrate.
- Gjevrek me salmon të tymosur: Kur nuk keni dëshirë të gatuani, blini një gjevrek me drithëra integrale dhe kombinoni me krem djathi dhe salmon të tymosur.