Fotografia nuk është vetëm një rrugë drejt kujtimeve. Ajo na mundëson të shohim më thellë, të zbulojmë horizonte të reja dhe të vërejmë bukuritë që nuk do t’i vinim re në shpejtësinë e jetës së përditshme. Lindja e diellit, një buzëqeshje e rastësishme ose një qen lozonjar në park – e gjithë kjo merr një dimension të ri sapo e shikojmë përmes objektivit.

Në momentet kur jeta e përditshme duket e zbehtë, monotone, stresuese ose e vetmuar, fotografia mund të na ndihmojë të lidhemi me atë që është e bukur dhe qetësuese përreth nesh. Ajo nxit kreativitetin, zgjon emocionet dhe shpesh ka efekt të ngjashëm me mbajtjen e një ditari – të ul me këmbë në tokë, të orienton dhe zgjon mirënjohjen te ne.

Në vazhdim ju sugjerojmë disa sfida frymëzuese fotografike të cilat mund t’i filloni që sot. Dhe e dini çfarë? Nuk keni nevojë për një aparat fotografik profesional – përdorni telefonin dhe shijoni hobin tuaj të ri.

Fotografia e ditës

Kjo sfidë është ideale nëse dëshironi strukturë në udhëtimin tuaj fotografik. Majfton të bëni çdo ditë nga një fotografi, për 365 ditë. Në fund, mund t’i bashkoni ato në një film të shkurtër, t’i printoni ose t’i radhisni në një album. Është një mënyrë e shkëlqyer për të zbuluar se si momentet e vogla, në dukje të parëndësishme, i japin ngjyrë vitit tuaj. Fotografitë mund të jenë të thjeshta ose të guximshme: një peizazh dimëror, një darkë familjare ose një autoportret.

Autoportretet

Autoportretet janë një sfidë e vërtetë, por jashtëzakonisht të dobishme. Ato janë mënyra përmes së cilës ne mësojmë ta pranojmë veten ashtu siç jemi, dhe njëkohësisht fitojmë më shumë vetëbesim. Mund të bëni autoportret një herë në javë (gjithmonë në të njëjtin vend) dhe të vini re ndryshimet nëpër të cilat kaloni. Ose të krijoni një seri fotografish që përfaqësojnë rolet e ndryshme që keni – profesionale, familjare, shoqërore.

Alfabeti i fotografive

Kjo sfidë është perfekte nëse dëshironi drejtim, por nuk keni një ide konkrete se çfarë të fotografoni. Qëllimi është të krijoni një fotografi për secilën shkronjë të alfabetit – çdo ditë nga një. Disa shkronja do t’ju shtyjnë të jeni veçanërisht krijues, gjë që e bën detyrën edhe më tërheqëse. Kur të keni mbledhur 31 fotografi, mund të filloni një cikël të ri ose të përpunoni ato që keni realizuar. Me çdo përsëritje, do të vini re përparimin tuaj teknik dhe krijues.

Një ditë, një histori

Ky projekt tregon se si duket një ditë tipike – e juaja apo e dikujt tjetër. Fotografitë nuk kanë pse të jenë spektakolare: kafeja e mëngjesit, rruga deri në punë ose aktivitetet në shtëpi, mund të tregojnë shumë më tepër sesa mendojmë. Pikërisht këto zakone të vogla të përditshme krijojnë një histori intime dhe autentike. Projekti është ideal edhe nëse dëshironi të dokumentoni ditën e një fëmije, prindi, kafshe përkëdhelëse ose një anëtari të moshuar të familjes.

Fotografi me temë mirënjohjeje

Kjo është një nga sfidat më të bukura dhe më terapeutike të fotografisë. Çdo fotografi përfaqëson diçka për të cilën jeni mirënjohës: një vakt të preferuar, një bluzë të ngrohtë, një libër, një person të rëndësishëm për ju ose një moment që ju ka zbukuruar ditën. Pas disa muajsh, do të keni një galeri të mbushur me momente personale dhe të ngrohta të cilat dëshmojnë bukurinë e jetës suaj – të madhe apo të vogël. Ky projekt na mëson të kërkojmë të mirën në çdo ditë dhe të vlerësojmë atë që na sjell gëzim.