Kur dimri i mbulon Alpet me një mbulesë madhështore të bardhë, qytetet nën to bëhen edhe më të bukura dhe të qeta. Njëri prej tyre është Bled – një qytet i vogël slloven ku natyra, tradita dhe qetësia jetojnë në harmoni të përsosur. Në janar, Bled duket si një skenë filmi: liqeni është i qetë, ajri i freskët dhe pamja nga ishulli me dëborë duket sikur ju fton të ngadalësoni ritmin dhe të shijoni momentin.

Liqeni që ruan shpirtin e dimrit

Skena kryesore është padyshim Liqeni Bled. Pavarësisht nëse do të zgjidhni një shëtitje të qetë përgjatë shtegut të rregulluar apo një meditim të shkurtër me pamje nga ishulli, heshtja dimërore është sigurisht shëruese për trurin e zhurmshëm. Nëse moti është mjaft i ftohtë, liqeni ndonjëherë krijon një shtresë të hollë akulli në sipërfaqe, duke i dhënë një atmosferë edhe më festive.

Ishulli – atje ku dëshirat bëhen realitet

Në qendër të liqenit ndodhet një ishull i vogël me kishën e “Shën Mërisë”. Mënyra më e mirë për të arritur atje është me varkë tradicionale, e drejtuar nga varkëtarë vendas. Sipas legjendës, ai që i bie kambanës së kishës dhe mendon një dëshirë, ajo do të realizohet. Një rast i mrekullueshëm për një aventurë të vogël dimërore!

Kalaja e Bledit – rojtar mbi liqen

Në një shkëmb mbi liqen, ngrihet Kalaja e Bledit, kalaja më e vjetër sllovene. Në janar, pamja nga atje është një kartolinë e vërtetë dimërore: malet në largësi, ngjyra e qetë blu e liqenit, ishulli si një perlë… Kurse brenda kalasë, mund të vizitohen dhomat e vjetra, muzeu, madje edhe një kantinë vere tradicionale ku vizitorët mund të mbushin vetë shishen e tyre dhe ta vulosin me dyllë.

Kënaqësi termale – ngrohtësi në mes të të ftohtit

Pas një shëtitjeje në ajrin e ftohtë alpin, trupi dhe shpirti kënaqen më së shumti në burimet natyrore termale. Disa hotele pranë liqenit kanë pishina me ujë të ngrohtë mineral, ideale për relaksim, rigjenerim të muskujve dhe përmirësim të qarkullimit.

Kënaqësi gastronomike

Bledi ka simbolin e vet dallues: “kremshnitën” e Bledit ose krempiten ​​– një ëmbëlsirë e lehtë me vanilje dhe me kore krokante. Mjafton një copë për të kuptuar pse e gjithë bota e njeh këtë mrekulli të vogël të ëmbël.