A është me të vërtetë mëngjesi vakti më i rëndësishëm i ditës ose ndonjëherë është e pranueshme ta anashkalojmë atë? Nuk ka një përgjigje definitive për këtë pyetje, gjithçka varet nga organizmi juaj dhe qëllimet që dëshironi të arrini me peshën.

Hani mëngjes për muskuj, anashkaloni për më pak kilogramë

Falë agjërimit gjatë natës, nivelet e glikogjenit të muskujve janë në nivelin më të ulët kur zgjoheni në mëngjes. Hulumtimet e fundit tregojnë se të shkosh në palestër herët në mëngjes (para mëngjesit) është një mënyrë e shkëlqyer për të sulmuar yndyrat e papërgatitur dhe për t’i shkrirë ata më lehtë. Por, nëse humbja e peshës nuk është qëllimi juaj, anashkalimi i mëngjesit nuk do t’ju bëjë mirë. Ekziston një studim tjetër shkencor që tregon se personat që nuk kanë ngrënë mëngjes dhe kanë ushtruar në orët e vona, nuk kanë treguar rezultate domethënëse në përparimin e masës muskulore. Konkluzioni? Nëse dëshironi ta theksoni dhe të rrisni masën muskulore, mëngjesi do t’ju shërbejë si një lloj karburanti për stërvitjen që vijon. Nëse dëshironi të zvogëloni peshën trupore, rezistoni ushqimit, shkoni fillimisht në stërvitje.

Hani mëngjes që të mos bëni zgjedhje të gabuara ushqimore gjatë pjesës tjetër të kohës

Nëse e anashkaloni mëngjesin, ka më shumë gjasa që të pini më shumë kafe dhe më shumë cigare gjatë ditës (nëse jeni duhanpirës), dhe gjithashtu gjasat janë më të mëdha që të humbisni stërvitjen tuaj sepse nuk do të keni vullnet, tregon hulumtimi i bërë në Universitetin e Helsinkit. Por, lidhja mes mëngjesit dhe të qëndruarit në formë është sjellja. Domethënë, ata që hanë mëngjes, zakonisht kanë një ushqim më të ekuilibruar. Filloni ditën me diçka më të lehtë, smoothie, tërshërë, sallatë dhe së shpejti do të vëreni përfitimet.

Hani mëngjes që të mos ju rritet kolesteroli në gjak

Shkencëtarët e Revistës së Shkencave Nutricioniste (Journal of Nutritional Science) zbuluan se personat me mbipeshë të cilët nuk konsumonin mëngjes, më shpejt e humbnin yndyrën trupore, por shfaqën rritje të nivelit të kolesterolit në krahasim me ata që hanin drithëra çdo ditë për mëngjes. Hulumtimet e reja tregojnë se sheqeri është një faktor më i madh kur bëhet fjalë për sëmundjet e zemrës, sesa kolesteroli, që do të thotë se drithërat e pasura me sheqer nuk janë një ide e mirë.

Hani një vakt me bazë proteinash dhe pa sheqer

Ideja se mëngjesi do të përshpejtojë metabolizmin tuaj është vetëm një supozim. Jo, nuk do të humbisni asnjë gram nëse çdo mëngjes gënjeni veten se po hani një mëngjes të shëndetshëm, kur në fakt racioni juaj i drithërave po noton në sheqer. Cilësia e kalorive që hani është ajo që ka vërtet rëndësi. Prandaj, nëse vendosni që nuk mund të bëni pa mëngjes, të paktën përpiquni të hani ushqime të pasura me proteina si vezë, tërshërë, kos. Hulumtimet nga Universiteti i Misurit, Kolumbia, treguan se këto tre produkte reduktojnë akumulimin e depozitave të yndyrës.

Hani mëngjes herët për të reduktuar stresin

Sapo hapët sytë, kuptuat se ju pret përpara një ditë e gjatë dhe stresuese. Prandaj, përgatituni me mëngjes që në orën 8. Kjo është periudha kur hormoni i stresit, kortizoli fillon të aktivizohet dhe një mëngjes i ekuilibruar mund ta kthejë atë në normalitet. Përveç kësaj, hulumtimi i Universitetit të Misurit, Kolumbia, tregon se njerëzit që e anashkalojnë rregullisht mëngjesin kanë nivele më të ulëta të dopaminës, që do të thotë se ata janë më të prirur të konsumojnë sasi më të madhe të sheqerit gjatë ditës.

Hani mëngjes me të gjitha shqisat tuaja

Hani në mënyrë të arsyeshme dhe shqisore për të shfrytëzuar maksimalisht përfitimet e mëngjesit. E para nënkupton ngrënien e mëngjesit larg kompjuterit, nëse jeni në punë, ose larg televizorit nëse jeni në shtëpi. Hulumtimet e Universitetit të Birmingamit tregojnë se kur nuk jemi të fokusuar te ushqimi që e hamë, konsumojmë 25% më shumë sasi. Kur hamë shpejt ose lejojmë që rrethina të na shpërqendrojë nga ushqimi, nuk e lejojmë qendrën e oreksit në tru të regjistrojë se po hamë. E dyta nënkupton konsumimin e ushqimit me të gjitha shqisat – shijen, nuhatjen, strukturën, madje edhe tingullin e kërcitjes së ushqimit midis dhëmbëve në mënyrë që të ngopemi më shpejt dhe më gjatë.