Diabeti është një sëmundje kronike që mund të ketë ndikim në shumë organe dhe sisteme të trupit, duke përfshirë edhe syrin. Përderisa retinopatia diabetike është një nga ndërlikimet më të njohura, flitet më pak për sindromën e syrit të thatë – një gjendje që është gjithashtu e shpeshtë te pacientët me diabet dhe mund të dëmtojë ndjeshëm cilësinë e jetës.
Pse diabetikët shpesh kanë sy të thatë?
Rritja kronike e sheqerit në gjak mund të çojë në dëmtim nervor (të quajtur neuropati diabetike), duke përfshirë edhe ato që kontrollojnë prodhimin e lotëve. Njëkohësisht, ndjeshmëria e reduktuar e sipërfaqes së syrit e vështirëson përgjigjen natyrale të gjëndrës së lotit për tharjen. Rezultati është një film loti i çrregulluar, që shkakton simptoma të syrit të thatë.
Si të dalloni simptomat e syrit të thatë?
Simptomat e syrit të thatë mund të jenë delikate dhe të shfaqen gradualisht. Prandaj, është e rëndësishme që pacientët me diabet të dinë se ku duhet të kenë kujdes. Simptomat më të zakonshme përfshijnë:
- Një ndjesi pickimi ose djegie në sy
- Ndjenja sikur keni rërë ose trup të huaj në sy
- Pamje të turbullt, e cila përmirësohet pas mbylljes së kapakëve të syrit
- Skuqje dhe acarim
- Ndjeshmëri ndaj dritës (fotofobi)
- Paradoksale, por mund të shfaqet edhe lotim i tepruar– si reagim ndaj thatësisë.
- Lodhje të syve kur lexoni, punoni në kompjuter ose shikoni televizor
Nëse pacienti vëren një ose më shumë nga këto simptoma, dhe veçanërisht nëse zgjasin më shumë se disa ditë, është e nevojshme të kërkohet mendimi i një okulisti dhe të përshkruhet terapia e duhur.
Kur është i nevojshëm ekzaminimi okulistik?
Çdo pacient me diabet duhet të vizitojë okulistin të paktën një herë në vit për një kontroll rutinë, i cili përfshin një test të mprehtësisë së shikimit, presionin intraokular dhe ekzaminimin e fundusit në midriazë (bebëza e zgjeruar).
Ekzaminime më të shpeshta rekomandohen për pacientët të cilët tashmë janë diagnostikuar me komplikime të syrit nga diabeti, si dhe për pacientët që kanë simptoma akute, si:
- Shfaqje ose përkeqësim të simptomave të syrit të thatë (gërvishtje të theksuar, djegie, skuqje, etj.)
- Dëmtim të shikimit (reduktimi i shikimit ose shfaqja e “mizave” në fushën e shikimit)
- Nëse më parë ju kanë dhënë lot artificial, por simptomat tuaja nuk përmirësohen
Diagnoza e hershme e sindromës së syrit të thatë, si dhe ndërhyrja në kohë, janë thelbësore për parandalimin e dëmtimit të përhershëm të sipërfaqes së syrit dhe përmirësimit të cilësisë së jetës.
Parandalimi dhe kujdesi i përditshëm
Sindroma e syrit të thatë mund të kontrollohet dhe lehtësohet me disa masa të thjeshta por shumë të rëndësishme:
- Kontrolli i sheqerit në gjak – Një diabet i kontrolluar mirë nënkupton probabilitet më të ulët të shfaqjes së komplikimeve të syrit.
- Përdorimi i rregullt i lotëve artificialë – Është mirë që çdo pacient me diabet të ketë lot artificial në shtëpinë e tij për t’i përdorur kur shfaqen simptoma të syrit të thatë.
- Shmangia e ajrit të thatë, të ndotur ose të klimatizuar
- Pushimet e shkurtra gjatë punës së zgjatur në kompjuter dhe përdorimi i lotëve artificialë gjatë punës
- Të ushqyerit e shëndetshëm, i pasur me vitamina dhe minerale, si dhe marrja e sasisë së mjaftueshme të ujit
Syri i thatë është një gjendje e zakonshme, por shpesh e neglizhuar te pacientët me diabet. Dallimi i simptomave dhe kujdesi i rregullt okulistik janë çelësi për zbulimin në kohë dhe trajtimin e suksesshëm. Me kujdesin dhe disiplinën e duhur, pacientët mund të ruajnë shikimin dhe shëndetin e syve për një kohë të gjatë.