TINGUJT E BARDHË NUK JANË ALTERNATIVA E VETME
Ora 2:00 pas mesnate dhe ende nuk po ju merr gjumi? Provuat gjithçka, nga numërimi i deleve e deri te leximi i librave, por truri juaj thjesht nuk do të qetësohet? Beteja gjatë natës ju lodh aq shumë sa të nesërmen nuk mund ta merrni veten nga lodhja.
A keni provuar me tingujt e bardhë të qetësoni trurin dhe të nxisni trupin tuaj të relaksohet? Këta janë ato lloj tingujsh të këndshëm që duhet t’ju sjellin një ndjenjë paqeje dhe qetësie, kurse lëshimi i tyre rregullisht gjatë natës mund t’i dërgojë sinjal trupit tuaj se është koha për të pushuar, duke ju ndihmuar që me kalimin e kohës të ndërtoni zakone të shëndetshme të gjumit.
Është interesante se tingujt për këtë qëllim nuk janë vetëm të bardhë, por ekzistojnë edhe tinguj ngjyrë kafe, rozë, vjollcë dhe disa ngjyra të tjera. Por, cila ngjyrë do t’ju ndihmojë të ndaloni së rrotulluari në shtrat gjatë gjithë natës?
Sipas një studimi të Qendrës Evropiane për Kontrollin dhe Parandalimin e Sëmundjeve, më shumë se 14% e të rriturve kanë probleme me gjumin, ndërsa rreth 30% kanë simptoma të pagjumësisë. Stresi, problemet shëndetësore ose një mjedis i pakëndshëm (si zhurma e qytetit, një dhomë mbytëse, dysheku i parehatshëm) mund ta përkeqësojnë këtë betejë të natës.
Tingujt e gjumit janë ritmikë dhe qetësues dhe ndihmojnë në fshehjen e zhurmave shqetësuese të tilla si – përplasja e dyerve, trafiku i zhurmshëm, sirenat, zhurmat e njerëzve – të cilat mund t’ju zgjojnë.
Zhurma e bardhë njihet më së shumti për efektin e saj në përmirësimin e cilësisë së gjumit, veçanërisht për ata që jetojnë në mjedise të zhurmshme. Ajo përdor të gjithë gamën e frekuencave të zërit, duke krijuar një tingull të qëndrueshëm që mbulon tingujt e padëshiruar. Kjo mund të jetë një zgjidhje ideale nëse ju zgjon gërhitja juaj ose e partnerit tuaj, ose nëse jetoni pranë një autostrade ose hekurudhe. Por, disa njerëz e konsiderojnë atë si shumë të zëshme dhe të ashpër. Zhurma e bardhë mund të imitojë tinguj si zhurma e frigoriferit ose kondicionerit, tingujt e radiatorit ose ventilatorit. Nëse nuk keni një pajisje të posaçme për zhurmë të bardhë, provoni një ajrues kuzhine.
Zhurma kafe, në krahasim me zhurmën e bardhë, ka një ton më të thellë dhe më të këndshëm. Nuk ka frekuenca të larta dhe tingëllon si bubullimë e largët ose zhurma e valëve të detit. Për dallim nga zhurma e bardhë, zhurma kafe ka tinguj më të këndshëm dhe natyralë, gjë që e bën atë më të përshtatshme për relaksim. Disa përdorues me ADHD pretendojnë se zhurma kafe i ndihmon ata të përqendrohen dhe të qetësojnë mendjen e tyre.
Zhurma rozë ka karakteristika të ngjashme me zhurmën e bardhë, por me tinguj më pak të mprehtë me frekuencë të lartë. Kjo e bën më të butë dhe më të natyrshme, duke e bërë atë një zgjedhje të mirë për ata që duan një tingull më të qetë, si zhurma e shiut ose erës. Zhurma rozë, siç zbuloi një studim i vitit 2017, madje mund të përmirësojë cilësinë e gjumit, veçanërisht te njerëzit e moshuar.
Zhurma vjollcë për dallim nga zhurma kafe, zhurma vjollcë thekson frekuencat më të larta, duke e bërë atë më pak ideale për gjumë. Është interesante se ndonjëherë përdoret për të ndihmuar në trajtimin e tinitus-it (tringëllima e veshëve).
Zhurma gri e përdorur shpesh në joga dhe meditim, zhurma gri i thekson si frekuencat më të larta ashtu edhe ato më të ulëta. Ndryshe nga zhurma e bardhë, zhurma gri i përmban të gjitha frekuencat me lartësi të barabartë, ndërsa zhurma e bardhë i përmban të gjitha frekuencat me energji të barabartë, duke ofruar një përvojë të ndryshme gjatë dëgjimit.
Cila është zgjedhja më e mirë për të fjetur dhe për të pasur një gjumë të qetë?
Në fund të fundit, zgjedhja e ngjyrës së zhurmës varet nga preferencat personale. Nuk ka një zgjidhje universale, sepse secili person reagon ndryshe ndaj tingujve. Zhurma e bardhë përdoret shpesh për të bllokuar tingujt e jashtëm dhe për të përmirësuar cilësinë e gjumit, veçanërisht në qytetet e zhurmshme. Zhurma rozë dhe kafe, nga ana tjetër, janë më natyrale dhe më të volitshme për ata që duan një efekt më të butë dhe afatgjatë.
Gjëja më e rëndësishme është të zgjidhni llojin e zhurmës që është më qetësuese për ju dhe këtë do ta zbuloni duke u përpjekur të bini në gjumë me secilën prej tyre.