Kaq shumë fruta dhe perime, por kaq pak kohë për t’i ngrënë të gjitha. Prandaj, na lejoni t’ju ndihmojmë të përfitoni sa më shumë nga përzgjedhja e disponueshme në treg me disa rregulla të thjeshta.

Disa parime ushqyese janë fleksibile dhe të lehta për t’u përfshirë në vakte, ndërsa të tjerat e humbin dashamirësinë tonë nën ndikimin tendencave të ushqimit dhe kërkimeve të reja. Por, një gjë është e sigurt: Ne nuk do t’i shpëtojmë kurrë detyrimit për të konsumuar fruta dhe perime. Arsyeja? Nuk mund të ishte më e thjeshtë: ushqimi i bazuar në frutat e natyrës siguron një sërë përfitimesh shëndetësore.
Nuk po flasim vetëm për përmirësimin e gjakut ose një trup më të hollë, por për zgjatjen e jetëgjatësisë. Merrni parasysh këtë fakt: Rreziku i vdekjes së parakohshme nga cilido shkak, bie me 10 për qind për çdo rritje të ushqimit të shëndetshëm prej 2,5 racionesh, thonë studiuesit që analizuan 95 studime globale.
Është një debat i vazhdueshëm se sa dhe çfarë lloji nga të gjitha ushqimet e shëndetshme në dispozicion duhet të konsumoni. Do të mund të merrni mbështetje nga ata që ndjekin një dietë të gjelbër, ndërsa të tjerët do t’ju këshillojnë që frutat janë plot me sheqer dhe duhen shmangur.
Realisht, nuk ka asnjë arsye të fiksoheni nëse keni ngrënë disa kokrra rrush më tepër ose për faktin se keni ngrënë një banane para gjumit. Mbani mend se përfitimet më të mëdha shëndetësore vijnë nga rritja e konsumit të frutave dhe perimeve nga zero deri në pesë herë në ditë, kështu që përqendrohuni të arrini deri aty. Me këto rregulla të thjeshta do ta keni akoma më të lehtë të arrini rregullin 5 në ditë dhe ta ktheni atë në zakon.

Rregulli numër një: Mos u bëni skllav i rregullave

Qëndrimi i vazhdueshëm përpara rafteve me ushqime të freskëta ju ndan një hap nga krijimi i një raporti jo të shëndetshëm me të. Jo gjithmonë është në rregull dhe e mundur që gjithçka hani të jetë e freskët. Boronicat në tërshërë të njomur gjatë natës ose karota dhe kastravecë të prerë në tavolinë në vend të mezeve jo të shëndetshme, janë një mënyrë e shkëlqyer për të përmbushur sasinë e rekomanduar të racionit. Por nëse nuk arrini dot t’i përgatisni, ekziston një mundësi, edhe atë e shëndetshme.
Ku i blini dhe si i ruani frutat e shëndetshme është po aq e rëndësishme sa t’i hani të gjitha në numër. Në thelb, variantet e ngrira i mundin ato të freskëta për sa i përket sasive ushqyese të vitaminës C, beta-karotenit dhe folateve, ka zbuluar një studim. Dhe ky nuk është i vetmi studim që mbështet zgjedhjen e ushqimit të ngrirë. Ekspertët nga Universiteti i Çester-it në Angli krahasuan nivelet e vitaminës C në ushqimet e ngrira me nivelet te ushqimet e freskëta të ruajtura në frigorifer në 39 gradë. Me përjashtim të lulelakrës, nivelet ishin të ngjashme në të dy llojet. Por, pas mbajtjes disa ditore të perimeve të freskëta në frigorifer, niveli i vitaminës C ka filluar të bjerë në krahasim me atë të frutave të ngrira. Rënie më e madhe është vërejtur te boronicat.
Shumë nutricionistë thonë se variantet e ngrira janë edhe më ekonomike. Kjo është njëlloj sikur të blini një makinë dhe sapo modeli i ri me shkëlqim del nga salloni, e humb vlerën. E njëjta gjë vlen edhe për perimet dhe frutat e freskëta të sapo mbledhura. Përveç humbjes së disa prej lëndëve ushqyese, shumë nga frutat fillojnë të kalben para se të arrijnë në kuzhinën tuaj. Nga ana tjetër, ekzemplarët e ngrirë janë të cilësisë së lartë falë akullit që zgjat afatin e përdorimit.
Konkluzioni i përgjithshëm është se rritja e konsumit të frutave dhe perimeve në çdo formë do të ketë një efekt pozitiv për shëndetin. Prandaj, është mirë që të kombinohen pak nga të dyja. Për shembull, nëse bëni sallatë perimesh, është më mirë të përdorni ekzemplarë të freskët. Nëse bëni supë, perime të skuqura ose një pije frutash, frutat e ngrira janë një alternativë më e mirë.

Të ngrira apo të freskëta?

Udhëhiquni nga kjo listë gjatë blerjeve tuaja të radhës
TË FRESKËTA: qershi, pjeshkë, luleshtrydhe, misër i ëmbël, brokoli, bishtaja
TË NGRIRA: boronica, mjedra, manaferra, spinaq, bizele, lulelakër

 

Rregulli numër dy: Mos i hidhni frutat kot

Nëse nuk arrini të hani gjithçka, kjo nuk do të thotë që duhet ta hidhni menjëherë ushqimin. Silluni ndaj ushqimit në mënyrë racionale.
Qepë e mbetur
Do të mbajë erë nëse e vendosni në mbështjellës najloni, një opsion më i mirë është një enë qelqi që mbyllet hermetikisht. Në këtë mënyrë do të ruani freskinë e qepës dhe as ena nuk do të ketë aromë, gjë që nuk ndodh nëse është prej plastike. Ose thjesht vendoseni në një pjatë me anën e prerë të kthyer poshtë.
Patate të mbira
Akoma janë të ngrënshme nëse filizat janë të gjatë më pak se një centimetër. Thjesht prisni ato së bashku me pjesët e gjelbra dhe vazhdoni gatimin.
Spinaq i tharë
Për ta bërë spinaqin të zgjasë më shumë se zakonisht, lajeni mirë dhe thajeni, më pas ruajeni në një enë qelqi. Nëse tashmë është vonë dhe ka filluar të kalbet, thajeni në një tigan tefloni me një pikë vaj dhe ruajeni në frigorifer maksimumi edhe për tri ditë të tjera.
Avokado e zbutur
Avokadoja u bë shumë e butë? Perfekte! Kjo përbërje është e shkëlqyeshme për lyerje: Përzieni me hudhër, limon, borzilok dhe shpërndajeni sipër fetës së bukës duke i shtuar edhe një vezë të zier.

Rregulli numër 3: Vëzhgoni ngjyrat

Një pjatë plot ngjyra duket e bukur për syrin, por nuk ka asnjë provë të fortë që balanca e ngjyrave është e barabartë me balancën e lëndëve ushqyese. Është e njohur se: Ngjyrat e ndryshme kanë një efekt të ndryshueshëm ndaj rrezikut të shfaqjes së sëmundjeve. Lakrat, si lulelakra, lidhen me gjasa të zvogëluara për kancer, ndërsa agrumet dhe karotat mbrojnë nga sëmundjet e zemrës. Në vend që të merreni me paletën që e krijoni në shportën e blerjeve, thjesht përqendrohuni në zgjedhjen e të paktën tri ngjyrave dhe nuancave të ndryshme në ditë (mollë jeshile, spec i kuq, kungull) dhe do të arrini një gamë të tërë komponentësh ushqyes.