Luleshtrydhet nuk janë vetëm të shijshme, por edhe të pasura me vitamina, minerale dhe lëndë të tjera ushqyese. Ato prijnë me përmbajtjen e lartë të vitaminës C në përbërjen e tyre: një gotë (150 g) luleshtrydhe plotëson nevojën ditore për këtë vitaminë thelbësore. Përmbajnë mangan, folate (vitaminë B9) dhe kalium, të cilat janë të rëndësishme për funksione të ndryshme trupore, duke përfshirë shëndetin e kockave dhe rregullimin e presionit të gjakut. Luleshtrydhet janë të pasura me antioksidantë dhe polifenole të cilat ndihmojnë në uljen e nivelit të kolesterolit LDL (të keq) dhe përmirësojnë funksionin e enëve të gjakut. Nga antioksidantët më të njohur te luleshtrydhet janë antocianinat, të cilat u japin atyre ngjyrën e kuqe tërheqëse dhe mund të kontribuojnë në përmirësimin e shëndetit të zemrës. Luleshtrydhet janë një burim i shkëlqyer i fibrave (të tretshme dhe të patretshme) të cilat janë të dobishme për shëndetin e sistemit të tretjes, por edhe për zgjatjen e ndjenjës së ngopjes, gjë që ndikon në reduktimin e marrjes së kalorive. Ato gjithashtu kanë sheqer relativisht të ulët në krahasim me frutat e tjera, duke i bërë  një zgjedhje më të shëndetshme për të plotësuar nevojën për ëmbëlsirë. Falë indeksit të ulët glicemik, ato mund të ndihmojnë në rregullimin e niveleve të sheqerit në gjak. Fibrat që gjenden në luleshtrydhe gjithashtu ndihmojnë në ngadalësimin e përthithjes së sheqerit. Luleshtrydhet përmbajnë acid elagjik dhe antocianina, të cilat janë studiuar për vetitë e tyre potenciale kundër kancerit. Këto komponime mund të pengojnë rritjen e tumorit dhe të zvogëlojnë përhapjen e qelizave të kancerit.